1~Samuel 3 - Chuya Qellqa 1992

Samuelta Tayta Dios qayasqanmanta

¹ Samuelmi warmallaraq kachkaspan sacerdote Eliyta yanapaspan Tayta Diosta servirqa. Chay punchawkunapiqa Diosqa manañam pitapas ancha rimapayarqañachu, nitaqmi pimanpas revelarqañachu.

² Huk tutam sacerdote Eliyqa cuartonpi puñuchkarqa, ñawsayayta qallaykuspanmi manaña allintaqa qawakurqañachu.

³ Samuelñataqmi Diospa templonpi puñuchkarqa, chaypitaqmi tarikurqa Diospa Arcanpas. Mecheropas hinallaraq ratachkaptinmi,

⁴ Samuelta Tayta Dios qayarqa: ¡Samuel, Samuel! nispan. Samuelñataqmi, nirqa: “Kaypim kachkani”, nispan.

⁵ Hinaspam Eliypa kasqanman kallpaspan nirqa: Taytáy ¿imapaqtaq qayamuwarqanki? nispan. Hinaptinmi Eliyñataq nirqa: Manam ñoqaqa qayaykichu, kutispayki puñukamuy, nispa. Chaymi Samuelqa kutirispan huktawan puñuykurqa.

⁶ Ichaqa Tayta Diosmi huktawan Samuelta qayarqa: ¡Samuel, Samuel! nispan. Chaymi Samuel hatarispan rirqa Eliypa kasqanman, hinaspam nirqa: Taytáy ¿imapaqtaq qayamuwarqanki? nispan. Hinaptinmi Eliyñataq nirqa: Churilláy manam ñoqaqa qayamurqaykichu, kutispayá puñukamuy, nispa.

⁷ Samuelqa manaraqmi Tayta Diosta reqsirqachu, Diospas manataqmi chay punchawkamaqa imatapas rimapayarqachu.

⁸ Samuelta kimsa kutikamaña Tayta Dios qayaptinmi, Samuelqa hatarispan Eliypa kasqanman rirqa, hinaspam nirqa: Taytáy ¿imapaqtaq qayamuwarqanki? nispan. Chaynapim Elí musyarurqa Samueltaqa Tayta Dios qayasqanta.

⁹ Chaymi Samuelta Elí nirqa: Kutispayki puñukamuy, huktawan qayamusuptikiqa kaynatam ninki: “Rimapayaykullawayá Dios Taytalláy, kay serviqnikiqa uyarichkaykim”, nispayki. Chaynata niptinmi Samuelqa kutikuspan kaqlla puñuykurqa.

¹⁰ Chaymi Tayta Diosqa asuykuspan puntata hina qayarqa: ¡Samuel, Samuel! nispan. Samuelñataqmi nirqa: Rimapayaykullawayá Diosnilláy, kay serviqnikiqa uyarisuchkaykim, nispan.

¹¹ Hinaptinmi Samuelta Tayta Dios nirqa: Israelpim hatun manchakuypaqta ruwasaq, chayta uyariqkunapaqqa rinrinkupas chanchanyanqam.

¹² Chay punchawpim cumplisaq sacerdote Eliyman ayllunkunamanta tukuy ima nisqayta.

¹³ Nirqaniñam churinkunapa millay hucha ruwasqanmanta aylluntapas wiñaypaq juzganaymanta, ñoqapa contraypi rimachkaptinkupas payqa manam qaqcharqachu.

¹⁴ Chayraykum Eliypa ayllunpa contranpi jurani, kay mana allin ruwasqanmantaqa manam haykapipas pampachasaqñachu, sacrificiota ruwaptinpas nitaq ofrendakunata qowaptinpas, nispan.

¹⁵ Chaymantam Samuelqa achikyanankama puñururqa, hinaspam Tayta Diospa wasinpa punkunta kicharqa. Samuelmi manchakurqa imam uyarisqankunata sacerdote Eliyman willaykuyta.

¹⁶ Qayaspanmi Samuelta Elí nirqa: Kuyasqay churilláy Samuel, nispa. Samuelñataqmi nirqa: Kaypim kachkani, nispan.

¹⁷ Chaymi sacerdote Elí tapurqa: ¿Imatataq Dios nisurqanki? Ama pakawaspa willaykuway. ¡Diosyá castigasunki imapas nisusqaykita pakawaptikiqa! nispan.

¹⁸ Hinaptinmi Samuelqa Tayta Diospa imam nisqanta lliwta willarqa. Eliyñataqmi nirqa: ¡Payqa Diosmi! ¡Imam munasqanman hina ruwachun! nispa.

¹⁹ Samuelpa wiñasqanman hinam, Tayta Diosqa paywan karqa; payqa manam usuchirqachu nitaqmi yanqacharqachu Diospa Chuya simintapas.

²⁰ Chaymi Israelpa llapallan mirayninkuna, Dan llaqtamanta qallaykuspan Beerseba llaqtakama yacharqaku Samuelqa cheqap profeta kasqanta.

²¹ Kaqllamantam Tayta Diosqa Silo llaqtapi rikuriykurqa. Chaypim Samuelta rimapayaspan reqsichikurqa, hinaptinmi Samuelñataq Israelpa mirayninkunaman willarqa.