1~Samuel 28 - Chuya Qellqa 1992

¹ Chay punchawkunapim filisteokuna tropankunata huñururqaku Israel castakunawan peleanankupaq, chaymi Davidta rey Aquis nirqa: Qamqa ñoqawanmi soldadoykikunapiwan guerraman lloqsinki, nispa.

² Davidñataqmi nirqa: Arí qanwanmi lloqsisaq, kunanmi yachanki kay serviqnikipa imam ruwasqanta, nispa. Chaymi rey Aquis nirqa: Chaynaqa, waqaychaqniy soldadoypaqyá churasqayki, chaynaqa kanki kawsakunay punchawkamam, nispa.

Endor llaqtayuq brujata Saúl tapukusqanmanta

³ Samuelmi wañukurqaña, Israel runakunapas paymanta llumpayta waqaspankum Ramá llaqtanpi pamparamurqaku. Saulñataqmi qatipaqkunata chaynataq wañuqpa alman qayaqkunata Israel nacionmanta wischururqa.

⁴ Filisteokunam huñunakuruspanku campamentonkuta Sunem llaqtapi sayachirqaku. Saulpas Israel runakunata huñuruspanmi Gilboapi campamentonta sayachirqa.

⁵ Filisteokunapa campamentonta rikuruspanmi Saulqa llumpayta mancharikururqa sonqonpas hukmanyanankama.

⁶ Chaymi Tayta Diosta Saúl tapuptin mana imallatapas nirqachu, musqoypipas, urimnintapas nitaq profetantakamapas.

⁷ Hinaptinmi serviqninkunata Saúl kamachirqa: Maskamuychik wañuqpa alman qayaq warmita, chaynapi payman rispay tapukamunaypaq, nispa. Serviqninkunañataqmi nirqaku: Endor llaqtapim huk warmi kachkan wañuqkunapa alman qayaq, nispa.

⁸ Chaymi Saulqa mana reqsichikunanpaq huk pachawan churakuruspan iskay runawan pusachikuspan chay warmipa kasqanman tutallan rirqa. Chayaruspanmi nirqa: Ama hina kaspayá ñoqapa nisqay runapa almanta qayaykapullaway, nispa.

⁹ Hinaptinmi chay warmi nirqa: Qamqa yachankim Saulpa imam ruwarusqantaqa. Payqa kay nacionmantam qatipaqkunatawan wañuqpa alman qayaqkunata qarqorun. Kay mañakuwasqaykiwanqa wañuymanmi tanqawachkanki, nispa.

¹⁰ Chaymi Tayta Diosrayku juraspan Saúl kaynata nirqa: Tayta Diosqa kawsanmi, manan pipas imanasunkichu, nispa.

¹¹ Chay warmiñataqmi nirqa: ¿Pi qayanaytataq munanki? nispa. Saulñataqmi nirqa: Samueltayá qayaykapuway, nispan.

¹² Hinaptinmi Samuelta rikuruspan chay warmi sinchita qaparirqa, hinaspanmi Saulta nirqa: ¿Imanasqataq pantarachiwanki? Qamqa Saulmi kachkanki, nispa.

¹³ Chaymi rey Saúl nirqa: Ama manchakuychu ¿imatataq rikurunki? nispa. Chay warmiñataqmi nirqa: Allpamanta lloqsimuchkaq almatam rikuruni, nispa.

¹⁴ Hinaptinmi Saúl tapurqa: ¿Imayna rikchayniyuqtaq kasqa? nispa. Warmiñataqmi nirqa: Huk yuyaqmi capanwan tapakuykuspan hamuchkan, nispa. Chaymi Samuel kasqanta yachaykuspan Saúl qonqoranpa kumuykurqa.

¹⁵ Hinaptinmi Saulta Samuel nirqa: ¿Imanasqataq qayachimuwaspayki churmichawanki? nispa. Saulñataqmi nirqa: Filisteokuna contraypi peleaq hamurusqankuraykum ancha sasachakuypi kachkani. Diosmi ñoqamanta karunchakurun, manañam imallatapas niwanñachu, profetantakamapas nitaq musqoypipas. Chayraykum qayachimurqayki imam ruwanayta niykuwanaykipaq, nispa.

¹⁶ Chaymi Samuel nirqa: ¿Imanasqataq ñoqata tapuwanki Tayta Diospuni enemigoyki rikuriruchkaptinqa?

¹⁷ Ñawpaqta ñoqantakama nisusqaykita hinam Tayta Diosqa ruwachkan. Rey kaynikita qechususpaykim puriqmasiki Davidmanña qoykun.

¹⁸ Sinchi piñakuyninpim Tayta Diosqa kamachisurqanki, Amalec runakunata qalay-qalayta wañuchimunaykipaq chayta mana kasukusqaykiraykum kaytaqa Tayta Dios ruwasuchkanki.

¹⁹ Kunanmi Tayta Dios qamtawan Israel castakunata filisteokunapa makinman churasunkichik, hinaptinmi paqarin churikikunawan kuska ñoqawanña tarikunki. Israel tropakunatapas Tayta Diosmi filisteokunaman hapiykachinqa, nispa.

²⁰ Chaymi Samuelpa nisqanta uyariykuspa Saúl sinchita mancharikuspan pampaman wichiykurqa, huk punchaw hinaspa huk tuta mana mikusqanraykum mana kallpayuq tarikurqa.

²¹ Chaymantam Saulta mancharisqallataña qawaykuspan chay warmi nirqa: Kay serviqnikiqa imam mañawasqaykita kasukuspam wañuytapas mana manchakuykuspay kamachiwasqaykita ruwaruni.

²² Chaynaqa, ama hina kaspayá kay nisqayta uyariykullaway: Mikuyta qaraykamuptiyá chaywan kallpanchakuspa kutikuy, nispa.

²³ Saulñataqmi mana munaspan nirqa: Manam mikuymanchu, nispa. Ichaqa serviqninkunawan chay warmi hikutaptinkum, pampamanta hatariykuspan camapi tiyaykurqa.

²⁴ Chay warmipam wasinpi karqa poqochikusqan malta toron, chaytam utqayman nakarurqa. Chaymantañataqmi harinata chapuspa mana levadurayuq tantata ruwarurqa.

²⁵ Hinaspam Saulmanwan serviqninkunaman mikunankupaq aparamurqa, chayta mikuykuspankum chay tutalla pasakurqaku.