1~Samuel 2 - Chuya Qellqa 1992

Diosta Ana yupaychasqanmanta

¹ Anam Diosta mañakuspan nirqa: Dios Taytalláy, tukuy sonqoymantam kusikuchkani, qamllapim ñoqaqa kallpanchakuchkani, enemigoykunapa simintam upallachini, salvaykuwasqaykimantam kunanqa kusikuchkani.

² Dios Taytalláy, ¡Qam hina chuyaqa manam pipas kanchu! ¡Qanmanta hukqa manam pipas kanchu! ¡Qam hina harkaykuwaqniyqa manam pipas kanchu.

³ Amayá pipas rimachunchu hatun tukuspaqa, amayá pipas alabakuchunchu llumpaytaqa, Tayta Diosmi yachan runapa tukuy allin mana allin ruwasqanta.

⁴ Payqa kallpasapakunapa flechankuna pakipaqmi, mana kallpayuq runata kallpanchaqmi.

⁵ Saksaruspa puchupakuqkunam kunanqa parten tantallapaqña llamkapakuchkanku, yarqaymanta kaqkunam saksasqaña kachkanku, mana wachakuqkunapas qanchiskama wawayuqñam kachkanku, achka wawayuqkunañataqmi mana wachakuqña kachkanku.

⁶ Tayta Diosllam wañuchinpas kawsachinpas, payllataqmi wañuqkunapa kasqanman wischuykuqpas, chaymanta hurqomuqpas.

⁷ Tayta Diosllam wakchayachiqpas apuyachiqpas, payllataqmi uchuychaqpas hatunchaqpas.

⁸ Diosllam wakchatapas hatarichin, payllam millay lugarmanta usuqkunatapas sayarichin, allin reqsisqa runakunawanmi tiyaykachin. Tayta Diosmi kay pachata takyachin.

⁹ Payqa hapipakuqninkunatam waqaychan, mana allin runakunam ichaqa tutayaypi chinkanqaku, manam pipas vencenmanchu kikinpa kallpallanwanqa.

¹⁰ Tayta Diosmi chinkarachinqa contranpi sayariqkunataqa, hanaq pachamantam rayokunata hawankuman kachaykamunqa. Tayta Diosmi juzganqa kay pachapi runakunataqa; kallpanchanqam akllakusqan reytapas, akllakusqanpa atiynintam hatunchanqa, nispa.

¹¹ Chaymantam Elcanaqa Ramá llaqtapi wasinman kutikurqa; Samuelñataqmi sacerdote Eliywan qeparurqa Tayta Diosta servinanpaq.

Eliypa churinkuna huchallikusmanta

¹² Eliypa churinkunam karqaku mana allin ruwaqkuna. Paykunaqa manam Diosta manchakurqakuchu,

¹³ nitaq sacerdote kaspa llaqta nanachikuyninkutapas. Chaymi runakuna costumbreman hina sacrificiota Diosman ofreceptinku, sacerdotepa sirvienten trincheyuq rispan aychata yanuchkaptinku,

¹⁴ chay trinchiwan mankamanta aychachata atisqanta sacerdotepaq hurqokamuq. Chaynatam ruwaqku Silo llaqtaman riq llapallan Israel runakunawan.

¹⁵ Chaynataqmi altarpi wirata manaraq kañachkaptinku, sacerdotepa sirvienten rispan, Diosman sacrificio ofreceq runata niq: Sacerdotepaq kankanaypaqyá aychata qoway. Yanusqatañaqa manam chaskisunkimanchu, aswanqa chawallatam, nispan.

¹⁶ Sichum animal ofreceq runa niq: Wiranraqyá puntataqa ruparuchun chaymantañayá munasqaykita hurqokuykuy, nispa. Hinaptinqa sirvientem niq: Manam ¡Kunanmi qowankiqa! Mana chayqa qechurusqaykipunim, nispa.

¹⁷ Chaynatam chay joven sacerdotekunaqa Diospa qayllanpi millakuypaqta huchallikuqku. Paykunaqa Diosman qosqanku ofrendakunatam mana kaqpaq hapiqku.

¹⁸ Samuelñataqmi linomanta efodwan pachasqa Diosta serviq. Payqa karqa warmallaraqmi.

¹⁹ Sapa watam Anaqa qosantin, costumbrenkuman hina sacrificiota Diosman ofrecenanpaq Silo llaqtaman hamuspa, Samuelpaq pachata ruwaspan apamuq.

²⁰ Chaymi sacerdote Elí, Elcanatawan warmin Anata bendecirqa kaynata nispan: Tayta Diosyá kay warmikipi, Diosmanta mañakusqan wawapa rantinpi, achka churikikunata qosunki, nispa. Chaymantam wasinkuman kutikurqaku.

²¹ Hinaptinmi Diospa yanapakuyninwan Ana wiksayakururqa, chaymi wachakurqa kimsa qari wawakunata chaynallataq iskay warmi wawakunatapas. Samuelñataqmi Diospa ñawpaqninpi wiñarqa.

²² Sacerdote Eliymi llumpay machuña karqa, yacharqam churinkunapa Israel runakunawan millay hucha ruwasqankuta, yacharqataqmi Diosman asuykuna carpapa punkunpi serviq warmikunawan puñukusqankutapas.

²³ Chaymi paykunata Elí nirqa: ¿Imanasqataq kaykunata ruwankichik? Ñoqamanmi llaqtantin runakuna willawanku mana allin ruwasqaykichikta.

²⁴ Churillaykuna amayá kaykunataqa ruwaychikchu, llaqtantin runakunam qamkunamanta mana allinta rimanku.

²⁵ Sichum pipas runamasinpa contranpi huchallikuptinqa Diosmi allinyanachinman. Ichaqa pipas Tayta Diospa contranpi huchallikuptinqa ¿pitaq paywan allinyanachinman? nispa. Chaynata taytanku niptinpas paykunaqa manam kasukurqakuchu. Tayta Diosqa ñam tantearurqaña paykunata wañurachinanpaq.

²⁶ Samuelñataqmi wiñarqa, Diospa chaynataq runakunapa qayllanpi allin qawasqa.

²⁷ Huk punchawmi Diospa profetan, sacerdote Eliyman hamuspan nirqa: Tayta Diosmi nin: “Egipto nacionpi ñawpaq taytaykikuna rey Faraonta servichkaptinkum, paykunaman rikurirqani.

²⁸ Chaymi Israelpi llapallan ayllukunamanta ñawpaq taytayki Aaronpa castankunata akllarqani sacerdoteykunaña kanankupaq, chaynapi animalkunata altarniypa hawanpi chaynataq inciensotapas kañapuwanankupaq hinaspa efodwan churakuspa ñawpaqniypi serviwanankupaq. Qorqanitaqmi Israelpa mirayninkunapa kañasqan ofrendakunatapas.

²⁹ ¿Imanasqataq ñoqapa kamachisqay sacrificiokunata chaynataq ofrendakunata mana valeqpaq hapirunkichik? ¿Imanasqataq ñoqamantapas mastaraq churikikunata hatuncharunki? Israel llaqtaypa allinnin ofrendakunawanmi paykunata wirayarachinki”, nispa.

³⁰ Chayraykum Israelpa yupaychasqan Tayta Dios kaynata nin: Ñoqam nirqani miraynikipas chaynataq ñawpaq taytaykikunapa mirayninpas wiñaypaqña serviwanankupaq. Kunanmi ichaqa prometekusqayta mana ruwasaqñachu. Ñoqaqa pim hatunchawaqniytam hatunchasaq, qepanchawaqniytam ichaqa asllapaq hapisaq.

³¹ Hamuchkanmi punchawkuna aylluykiman chaynataq ñawpaq taytaykikunaman atiy qosqayta chinkarachinaypaq. Castaykimantaqa manañam pipas machuyayman chayanqachu.

³² Israelpa mirayninkunata sumaqllataña yanapaptiymi paykunamanta envidiakunki. Qampa aylluykimantaqa manañam pipas yuyaqyaykamaqa chayanqañachu.

³³ Altarniypi serviwananpaq aylluykimanta hukllatapas puchuchispayqa puchuchisaq waqasqallaykipi kanaykipaqmi, sonqoykipas nanaypi kananpaqmi. Wakin miraynikikunaqa kallpankupi kachkaspallaraqmi wañuchisqa kanqaku.

³⁴ Kaymi qampaq señal kanqa: Churiki Fineeswan Ofnim chay punchawllapi wañunqaku.

³⁵ Ñoqam ichaqa allin sacerdoteyta akllakusaq sonqoyman hinaspa munasqayman hina ruwaqta, mirayninpas allin takyaqmi kanqa; sapaqchakusqay reytam sapa punchaw servinqa.

³⁶ Chaymi pipas aylluykimanta kawsasparaq qepaqqa, ñawpaqninpi qonqorakuykuspan ninqa: “Ama hina kaspaykiyá asllaña pagawanayki kaptinpas otaq parten tantallaña qowanayki kaptinpas, sacerdotekunaman hina llamkayta qoykullaway, chaynapi asllatapas mikunaypaq”, nispa.