1~Samuel 16 - Chuya Qellqa 1992

Rey kananpaq David sapaqchasqa kasqanmanta

¹ Tayta Diosmi Samuelta nirqa: ¿Haykapikamataq Saulmanta waqanki? Ñoqaqa Israelpi rey kayninmantam qarqoruniña. Aceite apaykachanayki waqraman aceiteta hillpuspayá Belén llaqtayuq Isaipa wasinman riy, paypa huknin churintam rey kananpaq akllaruni, nispa.

² Samuelñataqmi nirqa: ¿Imaynataq riyman? Saúl yacharuspancha wañurachiwanqa, nispa. Hinaptinmi Tayta Dios nirqa: Vaquillata pusarikuspaykim ninki: “Diosman ofreceqmi hamuchkani”, nispa.

³ Hinaspam sacrificiota ruwaysisunaykipaq Isaita qayanki. Ñoqam imam ruwanaykita nisqayki, reqsichisqaykitaqmi rey kananpaq akllakusqayman aceiteta tallinaykipaqpas, nispa.

⁴ Chaynapim Samuelqa Tayta Diospa kamachisqanman hina ruwarqa. Belén llaqtaman Samuel chayaruptinmi, payta chaskinankupaq ancianokuna mancharisqallaña lloqsimurqaku, hinaspam tapurqaku: Taytáy ¿Allinpaqchu hamuchkanki? nispa.

⁵ Samuelñataqmi nirqa: Arí, Tayta Diosman sacrificio qoqmi hamuchkani, chaynaqa qamkunapas chuyanchakuychik sacrificiota Diosman qonanchikpaq, nispa. Chaymantam Isaitawan churinkunata chuyancharuspa sacrificiota ofrecenankupaq qayarqa.

⁶ Isaipa churinkuna chayaramuptinmi, Eliabta qawaykuspan Samuel yuyaymanarqa: Cheqaptapunim Tayta Diospa akllakusqan reyqa qayllanpi kachkan, nispa.

⁷ Ichaqa Tayta Diosmi Samuelta nirqa: Amayá sumaq rikchaynintawan sayaynillantachu qawayqa, paytaqa manam munanichu; runapa qawasqanqa manam ñoqapa qawasqay hinachu, runaqa hawallantam qawan, ñoqam ichaqa sonqonta qawani, nispa.

⁸ Chaymi Isaí churin Abinadabta qayarqa, hinaspam Samuelman asuykachirqa, hinaptinmi Samuel nirqa: Manam paychu Tayta Diospa akllasqanqa, nispa.

⁹ Chaymantam Isaiyqa churin Samata asuykachirqa, hinaptinmi Samuel nirqa: Manam paychu Tayta Diospa akllasqanqa, nispa.

¹⁰ Qanchisnintin churinkunata Isaí asuykarachiptinmi Samuel nirqa: Kay churikikunataqa manam Tayta Diosqa akllanchu, nispa.

¹¹ Hinaspam Isaita Samuel tapurqa: ¿Kayllachu churikikuna? nispa. Hinaptinmi Isaiñataq nirqa: Kachkanraqmi sullka kaq, payqa ovejatam michichkan, nispa. Chaymi Samuel nirqa: Payta qayachimuy, pay chayamunankamam manaraq mikusunchu, nispa.

¹² Isaí kamachikuptinmi qayamurqaku, hinaptinmi chay warmaqa kasqa sumaq rikchayniyuq, chukchanpas, ñawinkunapas, uyanpas ancha kuyayllapaq; chaymi Tayta Dios nirqa: Paymi rey kananpaq sapaqchakusqayqa, hatarispayki aceiteta talliy, nispa.

¹³ Chaymi Samuel, waqrapi aceiteta hapiykuspan wawqenkunapa qayllanpi Davidpa umanman talliykurqa; Chay punchawmantam Davidman Diospa Espiritun huntaykurqa. Chaymantam Samuelqa Ramá llaqtaman kutikurqa.

Saulpaq David arpata tocasqanmanta

¹⁴ Tayta Diospa Espiritunmi Saulmanta anchurikururqa, hinaptinmi Tayta Diospa kachamusqan mana allin espíritu Saulta ñakarichirqa.

¹⁵ Chaymi serviqninkuna Saulta nirqaku: Diosmi mana allin espirituta kachaykamusunki, chaymi ñakarichisuchkanki.

¹⁶ Chaynaqa, reynillayku, kay serviqnikikunatayá kamachiwayku pitapas arpa tocaqta maskamunaykupaq, chaynapi mana allin espíritu hapisuptiki arpata tocaptin hawkalla kanaykipaq, nispanku.

¹⁷ Chaymi Saúl nirqa: Maskamuychik pitapas allin tocaqta, hinaspayá pusamuwaychik, nispa.

¹⁸ Hinaptinmi huknin serviqnin nirqa: Ñoqam reqsini Belén llaqtayuq Isaipa huknin churinta, paymi allinta arpata tocan; payqa sinchi kallpayuqmi, guerrerom, yachaywan rimakuqmi hinaspa kuyayllapaq jovenmi; Tayta Diosmi pawan kachkan, nispa.

¹⁹ Hinaptinmi Isaiman kaynata nimunankupaq Saúl kacharqa: Oveja michiq churiki Davidta kachamuway, nispa.

²⁰ Chaymi Isaiyqa churin Davidta kacharqa rey Saulman, kikinwantaqmi apachirqa asnonpi tanta cargata, puyñupi vinota chaynataq uña cabrachatapas.

²¹ Saulpa kasqanman chayaruspanmi Saulta serviyta qallaykurqa, chaymi Saúl llumpayta kuyaruspan arman apaqpaq akllaykurqa.

²² Chayraykum Saulqa kamachirqa Davidpa taytan Isaiman kaynata nimunankupaq: Ama hina kaspaykiyá yanapawananpaq Davidta saqeykuy, payqa qayllaypim allinta qawaykachikun, nispanku.

²³ Diospa kachamusqan mana allin espíritu Saulta ñakarichiptinmi, Davidñataq arpanta tocaq, chaymi Saúl manaña ñakarispan allinyaykuq, mana allin espiritupas paymantam karunchakuq. Davidmanta willakuy Textokuna Payqa karqa Isaipa churinmi, warmallaraq kachkaspanmi aceitiwan tallispa sapaqchasqa karqa, Israelpa reynin kananpaq. 1 S 16.1-13 Paymi rey Saulpaq arpata tocapuq, mana allin espíritu ñakarichiptin, tumpallapas allinyananpaq. 1 S 16.14-23 Paymi filisteokunapa hatunkaray Goliatninta wañurachirqa, 1 S 17 Paymi ancha reqsisqa rikurirurqa. Saulpa churinwanmi casarakururqa. Saulqa chiqnipakuruspam imaynapas wañurachiypi rirqa, ichaqa manam atirqachu. 1 S 18—20 Paymi Saulmanta ayqekuspan runakunata huñururqa tropan kananpaq. Saulmi achka kutipi hapiruyta munarqa, chaywanpas Davidqa kikinta mana wañurachispanmi iskay kutipi pampachaykurqa. 1 Cr 12.1-22; 1 S 22—26 Saúl wañuchinanpaq kaptinmi tropankunapiwan Filistea nacionman ripukurqa. 1 S 27—30 Paymi llumpayta waqarqa Saulwan churin Jonatán wañukuptin. 1 S 31; 1 Cr 10; 2 S 1 Davidmi Judaman kutimuspa rey kananpaq churasqa karqa. Hebrompim qanchis wata parten munaychakurqa. 2 S 2—4 Kimsa chunka watayuq kachkaptinmi Israelpi munaychakuq kananpaq, aceitewan tallispa churarqaku. 2 S 5.1-5; 1 Cr 12.38-40 Filisteokunata venceruspanmi Diospa Arcanta Jerusalenman kutichimurqa. 1 Cr 11.4-9; 13; 6.31-48; 14-15; 16.37-42; 17; 2 S 5.6—7.29 Uriaspa warminwanmi waqllikururqa, kikin Uríastapas wañurachirqam. 2 S 11.1—12.23 Betsabeypi iskay kaq churin nacemuptinmi Salomonwan suticharqa. 2 S 12.24 Churin Absalonmi wawqen Amnonta wañurachirqa, hinaspam paypa contranpi hatarimurqa, chaymi Davidpa tropankuna wañurachirqaku. 2 S 13—18 Davidpa munaychakusqan watakunapim muchuywan guerra karqa. Paymi censota ruwachispa huchallikururqa. 1 Cr 21; 2 S 21; 24 Churin Salomontam aceitewan tallispa sapaqcharqa, paypa rantinpi munaychakuq kananpaq. 1 R 1.2-10; 1 Cr 22; 28-29.