1~Samuel 11 - Chuya Qellqa 1992

Amón runakunata rey Saúl vencerusqanmanta

¹ Amón runakunapa reynin Nahasmi hamurqa Galaadpi Jabes llaqtawan guerrapi peleananpaq. Chaymi Jabes runakuna rey Nahasta mañakurqaku: Contratota ruwaptinchikyá ñoqayku qamkunapa sirvientekichikña kasaqku, nispanku.

² Hinaptinmi Amón casta runakunapa reynin Nahasñataq nirqa: Sapakamapa alleq ñawikichikta hurqonay kaptinmi qamkunawanqa contratota ruwasaq. Chayta ruwaspaymi lliw Israel runakunata penqayman churasaq, nispa.

³ Chaymi Jabes llaqtayuq ancianokunañataq nirqaku: Qanchis punchawtayá suyaykuwayku chaynapi lliw Israel nacionpi willachimunaykupaq. Sichum manaña pipas yanapaqniyku kaptinqa qampañam kasaqku, nispanku.

⁴ Chay noticia willakuqkunam Saulpa yachasqan Gabaa llaqtaman chayarurqaku, chaypi llapa runakunaman willaykuptinkum qapariyllawanña waqarqaku.

⁵ Chayllamanmi Saulqa chakramanta chayaramurqa torokunata qatirikuspa, hinaspam tapukurqa: ¿Imanasqataq llapa runakuna waqachkanku? nispa. Chaymi Saulman Jabes llaqtayuq runakunapa noticia apamusqanta willaykurqaku.

⁶ Chayta uyariykuptinmi Saulman Diospa Espiritun huntaykurqa, hinaptinmi llumpa-llumpayta piñakururqa.

⁷ Chaymi iskay torokunata hapiykuspan chika-chikanta kuchuparuspan, chay willakuqkunawan Israel nacionman kaynata nispan apachirqa: “Kaynatam ruwanqa Saulwan chaynataq Samuelwan guerraman mana lloqsimuy munaq runapa toronkunawan”, nispa. Tayta Diosmanta manchakuy paykunaman huntaykuptinmi, chulla runa hinalla lloqsirqaku.

⁸ Bezec llaqtaman runakunata Saúl huñuruptinmi, Israel ayllumanta karqa kimsa pachak waranqa qarikuna, Judá lawmantañataqmi karqa kimsa chunka waranqa qarikuna.

⁹ Chaymantam Jabes llaqtamanta willakuqkunata Saúl nirqa: Jabes llaqtapi yachaqkunata kaynata nimuychik: “Paqarinmi yaqa chawpi punchawta librasqa kankichik”, nispa. Chaymi Jabes llaqtayuqkuna llumpayta kusikurqaku kay willakuy chaskisqankumanta.

¹⁰ Hinaspam enemigonku Amón runakunapa reynin Nahasta nirqaku: Paqarinmi makikiman churakusaqku munasqaykiman hina ñoqaykuwan ruwanaykipaq, nispa.

¹¹ Paqarinninmanmi tropankunata Saúl kimsaman rakirurqa, hinaspam manaraq achikyamuchkaptin Amón runakunapa campamentonman yaykuruspanku yaqa chawpi punchawkama nana-nanaqta wañurachirqaku. Puchuqkunañataqmi kayman chayman lluptikurqaku.

¹² Hinaptinmi Samuelta Israel runakuna nirqaku: ¿Pikunataq manam Saulqa reyninchikqa kanmanchu nispa nirqaku? ¡Chay runakunata qomuwayku wañuchinaykupaq! nispanku.

¹³ Chaymi Saulñataq nirqa: Kunan punchawqa manam pipas wañunqachu. Kunanqa Diosmi Israel runakunata libraykuwanchik, nispa.

¹⁴ Samuelñataqmi runakunata nirqa: Gilgal llaqtaman hakuchik, chaypiyá Saulpa rey kayninta cheqapchamusunchik, nispa.

¹⁵ Chaymi llapa runakuna Gilgal llaqtaman rirqaku, chaynapim Diospa ñawpaqninpi paykunapa reynin kananpaq Saulta chaskirqaku, hinaspam hawkayay sacrificiota Diosman ofrecespanku Saulwan Israel runakuna kuskanku anchallataña kusikurqaku.