1~Samuel 1 - Chuya Qellqa 1992

Samuelpa nacesqanmanta

¹ Efraín law orqonkunapim, Ramá llaqtapi yacharqa Elcana. Paymi karqa Jerohampa churin, Jerohamñataqmi Eliupa, Eliuñataqmi Tohupa, Tohuñataqmi Zufpa. Zufqa karqa Efratamantam.

² Elcanaqa iskay warmiyuqmi karqa: Anawan Penina. Peninaqa wachakuq warmim karqa, Anañataqmi qolluq.

³ Elcanam watan-watan Silo llaqtaman riq, Tukuy Atiyniyuq Diosta yupaychananpaq chaynataq sacrificiota ofrecemunanpaq. Chaypim sacerdote Elí iskaynin qari churinkunapiwan yacharqa, paykunam karqa Ofniwan Finees. Paykunam karqaku Tayta Diospa sacerdotenkuna.

⁴ Sacrificio qonan punchaw chayaramuptinmi Elcanaqa animalta kañaspan, warmin Peninaman chaynataq churinkunamanpas qariman warmiman, tocaqninkuta qoykuq.

⁵ Anamanmi ichaqa kuyasqanrayku allinninta qoykuq, Diospa munayninman hina mana wachakuq kachkaptinpas.

⁶ Chayraykum Peninaqa, Anata kamispan anchata llakichiq, mana wachakuqta Dios ruwasqanrayku.

⁷ Chaynatam ruwaq sapa wata Diospa wasinman riptinku, Peninam kamiqpuni, chaymi Anaqa waqaspan mana mikuqchu.

⁸ Qosan Elcanañataqmi nirqa: Ana, ¿imanasqataq waqachkanki? ¿Imanasqataq mana mikunkichu? ¿Imanasqataq llakisqa sonqoyuq kachkanki? ¿Manachu ñoqa chunka wawakunamantapas aswan allin kani? nispa.

⁹ Silo llaqtapi kachkaptinkum, Anaqa mikusqanmanta hatarirqa. Sacerdote Eliyñataqmi Diospa templonpa punkunpi tiyachkarqa.

¹⁰ Hinaspam Anaqa llumpay llakisqa sonqontin, sinchi waqakuywan Diosta mañakurqa.

¹¹ Chaymi prometekuspan Ana kaynata nirqa: Tukuy Atiyniyuq Tayta Diosnilláy, kay serviqnikipa ñakarisqanta qawaykuwaspaykiyá ama qonqaruwaychu. Qari wawata qoykuwaptikiqa Diosnilláy qampaqmi wañukunankama sapaqchapusqayki, chayraykum chukchanpas mana rutusqa kanqa, nispan.

¹² Chaynata Diospa qayllanpi Ana mañakuptinmi paypa siminta sacerdote Elí qawarqa.

¹³ Sonqollanpi mañakuptinmi Anapa simillan kuyurqa, rimasqanqa manam uyarikurqachu, chaymi Sacerdote Eliyñataq sinkapaq hapirqa.

¹⁴ Hinaptinmi Elí nirqa: ¿Haykapikamataq machasqa kanki? mallaqyayñayá, nispa.

¹⁵ Chaymi Ana nirqa: Manam taytalláy vinotapas nitaq ima sinkachikuqtapas tomarqanichu, ñoqaqa sonqoypi ancha llakisqam kachkani, chaymi Diospa qayllanpi sonqoymanta mañakuchkani.

¹⁶ Amayá mana allin warmipaqqa hapillawaychu, llumpay llakikuypi kaspaymi kunankama mañakurqani, nispa.

¹⁷ Eliyñataqmi nirqa: Hawkalla ripukuy, Israelpa Diosninyá tukuy mañakusqaykita qosunki, nispan.

¹⁸ Anañataqmi nirqa: Gracias kay serviqnikita allinpaq qawariykuwasqaykimanta, nispa. Chaymanta kutirispanñam Anaqa mikurqa, manañataqmi llakisqañachu karqa.

¹⁹ Tutapayta hatarispankum Diosta yupaycharqaku, hinaspam Ramá llaqtapi wasinkuman kutirqaku. Elcanam warmin Anawan puñurqa, hinaptinmi Tayta Dios mañakusqanta yuyarirurqa.

²⁰ Chaymi Anaqa wiksayakuruspan qari wawata wachakurqa, hinaspanmi Samuelwan suticharqa, Tayta Diosmanta mañakusqay wawam, nispa.

²¹ Chaymantam costumbrenman hina Elcanaqa lliw ayllunkunapiwan kuska Silo llaqtaman rirqaku, Tayta Diosman prometekusqan sacrificiota ofrecenanpaq.

²² Anam ichaqa mana rirqachu hinaspam qosanta nirqa: Ñoqaqa manam risaqchu wawata anukanaykama. Chaymantañam apaspay Tayta Diosman qomusaq chaypiña wañukunankama kawsananpaq, nispa.

²³ Qosan Elcanañataqmi nirqa: Munasqaykiman hinayá ruway, hinapiyá kachkay wawata anukanaykikama; Tayta Diosyá imam rimasqanta cumplichun, nispa. Chaynapim Ana qeparuspan wawanta uywarqa anukanankama.

²⁴ Wawata anukaruspanmi, taksallaraq kachkaptin, Silo llaqtapi Diospa wasinman Samuelta pusarqa, aparqataqmi kimsa watayuq torillotapas, iskay chunka iskayniyuq kilo harinatapas chaynataq huk puyñupi vinotapas.

²⁵ Torillota altarpi ofreceykuspanmi, sacerdote Eliyman warmata qoykurqaku.

²⁶ Chaymi Ana nirqa: Taytay cheqaptapunipas, ñoqam kachkani qampa qayllakipi Tayta Diosta mañakuq warmi.

²⁷ Dios Taytamantam kay wawata mañakurqani, kayqaya qoykullawan.

²⁸ Chaymi ñoqapas Tayta Diosman qochkani, sapa punchaw kawsayninpi Diosllataña wañukunankama servinanpaq, nispan. Hinaspam chaypi llapanku Tayta Diosta yupaycharqaku.