1~Reyes 1 - Chuya Qellqa 1992

Rey Davidta Abisag servisqanmanta

¹ Rey Davidmi llumpaytaña machuyaruspan qatakunawan qataptinkupas manaña qoniriqchu.

² Chaymi reyta serviqninkuna nirqaku: Reynillayku, manaraq qari reqsiq sipastayá maskamuchunku, atiendesuspayki hinaspa qanwan puñuspa qonichisunaykipaq, nispanku.

³ Chaymi Israel nacionpi maskamuspanku Sunem llaqtayuq Abisag sutiyuq sipasta tariramurqaku, hinaspam reyman pusamurqaku.

⁴ Chay sipasqa anchapas kuyayllapaqmi karqa; paymi reywan kuska puñuspa qonichirqa, reyqa warminwan hina puñuchkaspapas manam imanarqachu.

Adonías rey kayta munasqanmanta

⁵ Davidpa churin Adoniasmi rey kayta munarqa, chaymi hatun tukuspan nirqa: Ñoqam munaychakuq kasaq, nispa. Hinaspanmi carretakunata, caballopi sillakuqkunata chaynataq waqaychaqninpaqpas pichqa chunka qarikunata huñukururqa. Adoniasqa karqa Haguitpa wawanmi.

⁶ Taytanmi ichaqa mana haykapipas anyarqachu nitaq tapurqachu: ¿Imanasqataq chayta ruwachkanki? nispallapas. Adoniasqa karqa Absalonpa sullkanmi hinaspa sumaq rikchayniyuqmi.

⁷ Adoniasmi Sarviapa wawan Joabwan chaynataq sacerdote Abiatarwan hukllawakururqa, hinaptinmi paykuna yanaparqaku.

⁸ Sacerdote Sadocwan, Joiadapa churin Benaía, profeta Natán, Simei, Rei hinaspa rey Davidpa allinnin qari-qari soldadonkunam ichaqa mana Adoniaswanchu karqaku.

⁹ Adoniasmi Rogel pukyupa hichpanpi Zohelet qaqapa waqtanpi convidota ruwachispan ovejakunata, vacakunata hinaspa wirayachisqan animalkunata nakachirqa. Hinaspam reypa llapallan churinkunatawan Judapi kaq reypa llapallan serviqninkunata qayachirqa.

¹⁰ Ichaqa profeta Natanta, Benaiatapas, Davidpa allinnin qari-qari soldadokunatapas chaynataq wawqen Salomontapas manam qayachirqachu.

¹¹ Hinaptinmi Salomonpa maman Betsabeyta Natán tapurqa: ¿Manachum yachanki Haguitpa wawan Adonías reypaq churakurusqanta? Chaytaqa reyninchik Davidqa manam yachanchu.

¹² Chaynaqa, kawsakuynikita wawayki Salomonpa kawsakuynintapas salvayta munaspaqa kay nisqayta uyariy.

¹³ Rey Davidman rispa kaynata nimuy: “Reynilláy, kay serviqnikimanmi jurawarqanki wawayki Salomonmi ñoqapa rantiypi rey kanqa”, nispayki. Hinaptinqa ¿imanasqataq Adoniasqa kamachikuchkanña? nispa.

¹⁴ Reywan rimachkaptikim ñoqapas qepaykita yaykumusaq, hinaspam imam nisqaykita hinalla nisaq.

¹⁵ Hinaptinmi Betsabeyqa reypa kasqanman yaykururqa; reyqa ancha yuyaqñam karqa, chaymi Sunem llaqtayuq Abisag payta yanaparqa.

¹⁶ Reypa qayllanpi Betsabé kumuykuptinmi, reyñataq nirqa: ¿Imatataq munanki? nispa

¹⁷ Chaymi Betsabé nirqa: Reynilláy, yupaychasqanchik Tayta Diosraykum jurawarqanki, “wawayki Salomonmi ñoqapa rantiypi kamachikunqa hinaspa reypa tiyananpi tiyanqa”, nispayki.

¹⁸ Ichaqa mana yachasqaykitam Adoniasña kamachikuchkan.

¹⁹ Toronkunata, wirayachisqan animalninkunata, ovejankunata nakachispanmi, churikikunata, sacerdote Abiatarta chaynataq tropakunata kamachiq Joabtapas qayarachispanmi convidarun, churiki Salomontam ichaqa mana qayachirqachu.

²⁰ Chaynaqa, reynilláy, Israel nacionpi lliw runakunam suyachkanku qampa rantikipi pim munaychakuq kasqanta ninaykita.

²¹ Mana chayqa reynilláy, qam wañukuptikim ñoqapas chaynataq waway Salomonpas huchayuqpaq hapisqa kaymanku, nispa.

²² Betsabé chaynata reyman nichkaptinmi profeta Natán chayaramurqa.

²³ Chaymi reyman willarqaku: Profeta Natanmi kaypi kachkan, nispa. Hinaptinmi profeta Natanqa reypa qayllanman yaykuspan pampakama kumuykuspan,

²⁴ nirqa: Reynilláy ¿qamchu nirqanki Adoniasmi ñoqapa rantiypi munaychakunqa nispa?

²⁵ Payqa kunan punchawmi torokunata, wirayachisqan animalkunata, achka ovejakunata ofrecenanpaq uraykamuspan llapa churikikunata, tropakunapa capitanninkunata hinaspa sacerdote Abiatartapas convidaruptin Adoniaswan kuska mikuspanku upyaspanku ¡kawsachun rey Adonías! nispa qaparichkanku.

²⁶ Ichaqa manam qayachiwarqakuchu kay serviqnikitawan, sacerdote Sadocta, Joiadapa churin Benaiata hinaspa churiki Salomontapas.

²⁷ Chaynaqa, reynilláy ¿qamchu chaykunata kamachikurqanki? ¿Siervoykikunaman mana willawaspaykikuchu rantikipi munaychakuqta churarunki? nispa.

Salomonta rey kananpaq David churasqanmanta

²⁸ Hinaptinmi rey David kaynata nirqa: Betsabeyta qayamuychik, nispa. Reypa qayllanman Betsabé yaykuruptinmi,

²⁹ reyñataq nirqa: Llakiymanta librawaqniy kawsaq Tayta Diosraykum jurayki.

³⁰ Israelpa yupaychasqan Tayta Diospa sutinpi juraspaymi nirqayki: “Wawayki Salomonmi ñoqapa rantiypi munaychakunqa nispay”, chaynaqa payñam ñoqapa tronoypi tiyaspa munaychakunqa, nispa.

³¹ Chaymi Betsabeyqa reypa qayllanpi qonqoranpa kumuykuspan nirqa: ¡Wiñaypaq kawsachun Señorniy rey David! nispa.

³² Hinaptinmi rey Davidqa kamachikurqa sacerdote Sadoctawan, profeta Natanta hinaspa Joiadapa churin Benaiata qayamunankupaq. Reypa qayllanman paykuna yaykuruptinkum

³³ reyñataq nirqa: Serviqniykunawan compañachikuspa churiy Salomonta mulaypi sillaykachispa Gihón lawman pusaychik,

³⁴ chaypim sacerdote Sadocwan profeta Natán, aceitewan tallispa Salomonta Israel nacionpi rey kananpaq churamunqaku, qamkunañataqmi cornetata tocaspa ¡kawsachun rey Salomón! nispa qaparinkichik.

³⁵ Chaymanta kutimuptikichikmi palacioypi tiyaspan ñoqapa rantiypi munaychakunqa, ñoqam payta akllani Israelpi chaynataq Judapi rey kananpaq, nispa.

³⁶ Chaymi reyta Joiadapa churin Benaía nirqa: ¡Amén, Señoryá chaynata kamachikuchun! Payqa reyniypa yupaychasqan Tayta Diosmi.

³⁷ Imaynam qam reyniywanpas Tayta Dios karqa, chaynayá Salomonwanpas kachun, hinaspayá paypa munaychakuyninta qam reyniy Davidpa munaychakuynikimantapas aswan mastaraq hatunchachun, nispa.

³⁸ Hinaptinmi Sacerdote Sadoc, profeta Natán, Joiadapa churin Benaía, rey waqaychaq cereteo soldadokuna, peleteos soldadokuna, Salomonta rey Davidpa mulanpi sillaykachispa Gihón lawman pusarqaku.

³⁹ Chaypim Sacerdote Sadoc, Diospa carpanmanta waqrachapi aceiteta apamusqanwan Salomonman talliykurqa, chaymi cornetata tocaptinku llapa runakunañataq qaparirqaku: ¡Kawsachun rey Salomón! nispanku.

⁴⁰ Chaymantam paypa qepanta llapallan runakuna takispa qenata tocastin qatirqaku, hinaspam llumpayta kusikurqaku, paykunapa qaparisqankuwanmi allpapas kicharikuykuqmanña rikchakurqa.

⁴¹ Adoniasmi llapallan convidasqan runakunapiwan mikuyta tukuykuchkaspankuña qapariyta uyarirurqaku. Joabmi trompetapa waqayninta uyariruspan nirqa: ¿Imanasqataq runakuna llaqtapi llumpayta qaparichkanku? nispa.

⁴² Chaynata rimachkaptinmi sacerdote Abiatarpa churin Jonatán chayarurqa, hinaptinmi Adonías nirqa: Qamqa allinnin qari-qari runam kanki, allin willakuytachá apamuwachkankiku, nispa.

⁴³ Chaymi Jonatán nirqa: Manam allin noticiatachu willasqaykichik, aswanqa rey Davidmi Salomonta reypaq churarun.

⁴⁴ Hinaspanmi sacerdote Sadocta, profeta Natanta, Joiadapa churin Benaiata, cereteo soldadokunata chaynallataq peleteo soldadokunatapas, kamarachin Salomonwan rinankupaq, paykunañataqmi rey Davidpa mulanpi sillarachinku.

⁴⁵ Sacerdote Sadocwan profeta Natanpas Gihón lawpim Salomonta aceitewan tallispa rey kananpaq churarunku, chaymantam hatun kusikuywan kutiramunku, hinaspam llaqtapi qaparichkanku. Chay qapariytam qamkunapas uyarichkankichik.

⁴⁶ Salomonpas ñam reypa tiyananpi tiyarunña.

⁴⁷ Reypa serviqninkunapas riruspankum reyninchik Davidta alabaramunku: “Diosyá Salomontaqa qanmantapas aswan reqsisqataraq ruwachun, kamachikuynintapas qampamantaqa aswan hatuntaraqyá ruwachun”, nispanku. Rey Davidpas camanpi kumuykuspam Tayta Diosta yupaychaspan

⁴⁸ nirqa: Israelpa yupaychasqan Tayta Diosyá alabasqa kachun, kunan punchawmi churiyta palacioypi qawachkaptiy tiyaykachin, nispa.

⁴⁹ Chaymi Adoniaspa convidasqankuna uyariruspanku mancharikururqaku, hinaspam sapakama hatarispanku ripukurqaku.

⁵⁰ Adoniasñataqmi Salomonta manchakusqanrayku Diosman asuykuna carpaman rispan altarpa waqrachankunaman hapipakururqa.

⁵¹ Chaytam Salomonman kaynata willaykurqaku: Adoniasmi manchakususpayki altarpa waqrachankunaman hapipakuruspa nichkan: “Kunanpuni rey Salomón jurawachun ama wañuchiwananpaq”, nispa.

⁵² Chaymi Salomón nirqa: Sichum allin runa kaptinqa manam huk chukchallanpas pampaman wichinqachu, huchayuq kaspanmi ichaqa wañunqapuni, nispa.

⁵³ Hinaspanmi rey Salomonqa kacharqa altarpa kasqanmanta Adoniasta pusamunankupaq. Adoniasñataqmi rey Salomonpa qayllanman rispan qonqoranpa kumuykurqa, chaymi rey Salomón nirqa: Wasikiman ripukuy, nispa.