1~Corintios 6 - Chuya Qellqa 1992

Quejanakuymanta

¹ Qamkuna ukupi pipas iñiqmasinpa contranpi quejakuyta munaptinqa ¿imanasqataq riwaqchik Diospi mana iñiq autoridadkunamanraq iñiqkuna arreglasunaykichikpaq kachkaptinqa?

² ¿Manachum yachankichik Diospi iñiqkunaqa kay pachapi kaqkuna juzgananchikta? Kay pachapi kaqkunatapas juzganaykichik kachkaptinqa ¿manachu atiwaqchik taksa asuntokuna allichayta?

³ ¿Manachu yachankichik angelkunatapas juzgananchikta? ¿Chaychu kay pachapi taksa asuntokunata mana allichayta atichwan?

⁴ Kay pachapi kaqkunallamanta quejanakuspaqa, ¿imanasqataq Diospi mana iñiq autoridadkunamanraq rinkichik?

⁵ Kaytaqa nikichik penqakunaykichikpaqmi: ¿Manachu qamkuna ukupi kan pipas yachayniyuq, chaynapi wawqentin quejanakuptin allichananpaq?

⁶ ¿Allinchu kanman huk wawqe hukninpa contranpi mana iñiq autoridadkunaman quejakuynin?

⁷ Cheqaptapunipas kikikichikpura quejanakuynikichikqa penqakuypaqmi, ¿imanasqataq mana aguantaykunkichikchu mana allin ruwasuqnikichiktaqa otaq engañasuqnikichiktapas?

⁸ Qamkunaraqmi iñiqmasikichiktaqa mana allinkunata ruwaspa engañankichik.

⁹ ¿Manachu yachankichik Diospa munaychakuyninmanqa mana allin ruwaqkunaqa mana yaykunanta? Amayá engañakuychikchu: Diospa munaychakuyninmanqa manam yaykunqachu: Huchapakuypi puriqkunaqa, ídolo yupaychaqkunaqa, waqllikuqkunaqa, nitaq warmiwan hina qarimasinwan kaqkunaqa,

¹⁰ nitaq suwakunaqa, qollqella kuyaqkunaqa, sinkakuypi kaqkunaqa, cuento qepikunaqa nitaq engañakuqkunapas.

¹¹ Chaynam wakiqnikichikpas ñawpaqtaqa karqankichik, kunanmi ichaqa mayllasqaña hinaspa pampachasqaña kachkankichik, Señor Jesuspa sutinpi chaynataq Diosninchikpa Espiritunpa yanapakuyninwan mana huchayuqpaqña chaskisqa kanaykichikpaq.

Cuerponchikqa Diosllapaqña kasqanmanta

¹² Ruwaymanmi tukuy ima munasqayta, ichaqa manam lliwchu allin. Tukuy munasqaytam ruwayman ichaqa manam chay munasqaykunapa munaychakuruwanantaqa saqekusaqchu.

¹³ Mikuyqa wiksapaqmi, wiksañataqmi mikuypaq. Chaykunataqa Diosmi tuñichinqa. Cuerpoqa manam huchapakuypi purinapaqchu, aswanqa Señorpaqmi, Señorñataqmi cuerpopaq.

¹⁴ Imaynam Dios kawsarichirqa Señor Jesucristota chaynallataqmi ñoqanchiktapas atiyninwan kawsarichiwasun.

¹⁵ ¿Manachu yachankichik cuerpoykichikqa Cristopa cuerponpa parten kasqanta? ¿Cristopa cuerponpa partentachu chuchumikapa cuerponman hukllawayman? ¡Manapunim!

¹⁶ ¿Manachu yachankichik pipas chuchumikawan kakuruspanqa huk cuerpollaña kasqankuta? Qellqapas kaynatam nin: Iskayninkum huk runa hinallaña kanqaku, nispa.

¹⁷ Pipas Señorman hukllawakuspanqa espiritupim hukllaña paywan kachkan.

¹⁸ Huchapakuymanta ayqeychik, runapa huk rikchaq hucha ruwasqanqa manam cuerponpa contranpichu, huchapakuqmi ichaqa kikinpa cuerponpa contranpi huchallikun.

¹⁹ ¿Manachu yachankichik cuerpoykichik Chuya Espiritupa templon kasqanta? Chay Espiritutaqa Diosmi qamkunapi kananpaq qosurqankichik. Qamkunaqa manam kikikichikpañachu kankichik.

²⁰ Diosmi preciowan rantisurqankichik, chaynaqa cuerpoykichikwanyá Diosta hatunchaychik.