Yosua 16 - KYERƐW KRONKRON

Yosef ne Efraim asase no ahyɛde

¹ Na nea ntonto no yi maa Yosef mma no fi Yeriko Yordan ano, Yeriko asu no apuei, sare a efi Yeriko foro kɔ Betel bepɔw so no;

² na efi Betel de kɔ Lus, na etwam kɔ Arkifo hye so wɔ Atarot,

³ na esian kɔ atɔe, Yafletifo hye ho de kosi anafo Bet-horon hye so, na ɛde kɔ Geser, na ɛkɔpem mpoano.

⁴ Na Yosef mma Manase ne Efraim nyaa wɔn agyapade.

⁵ Na Efraimfo hye, sɛ wɔn mmusua te, ni: Wɔn agyapade hye ne Atarot-adar apuei de kosi atifi wɔ Bet-horon;

⁶ na ɔhye no fi kɔ atɔe wɔ Mikmetat, benkum fam, na ɛkɔntɔn kɔ apuei wɔ Taanat-silo, na etwa ho kɔ Yanoa apuei,

⁷ na efi Yanoa sian kɔ Atarot ne Naarat, na ɛka Yeriko, na ɛkɔpem Yordan ano.

⁸ Ɔhye no fi Tapua kɔ atɔe kosi Kana subon mu, na ɛkɔpem mpoano. Eyi ne Efraimfo abusuakuw no agyapade sɛ wɔn mmusua te;

⁹ ne nkurow a woyiyi maa Efraimfo wɔ Manasefo agyapade mu no, nkurow no nyinaa ne ɛho nkuraa.

¹⁰ Nanso wɔantu Kanaanfo a wɔte Geser no, na Kanaanfo no atena Efraim mu ayɛ nkoa de abesi nnɛ.