Yona 3 - KYERƐW KRONKRON

Ahonu asɛnka wɔ Niniwe

¹ Na AWURADE asɛm baa Yona nkyɛn ne mprenu so sɛ:

² Sɔre kɔ Niniwe kurow kɛse no mu, na kɔpae asɛm a mereka makyerɛ wo no kyerɛ wɔn.

³ Ɛnna Yona sɔre nam AWURADE asɛm no so siim kɔɔ Niniwe. Nso Niniwe yɛ kurow kɛse, nnansa na wɔde twa ho hyia.

⁴ Na Yona fii ase hyɛn kurow no mu nantewee da koro, na ɔpaee mu sɛ: Aka adaduanan na Niniwe abutuw.

⁵ Ɛnna Niniwefo no gyee Onyankopɔn dii, na wɔpaee mmuadadi, na wofurafuraa ayitama fi wɔn mu nnipa akɛse so kosii wɔn mu akumaa so.

⁶ Na asɛm no duu Niniwe hene nkyɛn no, ɔsɔre fii n’agua so, na oyii ne nguguso guu hɔ na ofuraa atweaatam, na ɔtenaa nso mu,

⁷ na ɔma wɔpaee mu kae Niniwe, ɔhene ne n’atitiriw asɛm so, kae sɛ: Nnipa ne afieboa, anantwi ne nguan mmfa hwee nnka wɔn ano, wɔmmma wonnkodidi, na wɔnnnom nsu nso.

⁸ Na nnipa ne afieboa mfurafura ayitama, na wonsu dennennen mfrɛ Onyankopɔn, na obiara nsan mfi ne kwammɔne so ne amim ade a ɛwowɔ wɔn nsam no ho.

⁹ Obi nnim sɛ ebia Onyankopɔn bɛsesa n’adwene wɔ nea ɔrebɛyɛ no ho, na wadan ne ho afi abufuhyew no ho, na wansɛe yɛn.

¹⁰ Na Onyankopɔn huu wɔn nneyɛe, sɛ wɔasan afi wɔn akwammɔne no so, na ɔsakraa n’adwene wɔ bɔne a ɔkae sɛ ɔde bɛyɛ wɔn no ho, na wanyɛ.