Yoel 1 - KYERƐW KRONKRON

Mmoadabi no

¹ AWURADE asɛm a ɛbaa Petuel ba Yoel nkyɛn ni.

² Muntie eyi, mo mpanyimfo, na monyɛ aso, mo asase sofo nyinaa. So saa ade yi aba mo bere so anaasɛ mo agyanom bere so pɛn?

³ Monka ɛho asɛm nkyerɛ mo mma, na mo mma nka nkyerɛ wɔn mma, na wɔn mma nso nka nkyerɛ awo ntoatoaso a edi so no.

⁴ Mmɛbɛw nnikae, mmoadabi adi, na mmoadabi nnikae, ntuntummɛ adi, na ntuntummɛ nnikae, mmɛbɛw adi.

⁵ Mo asabofo, munnyan na munsu, na mo nsanomfo nyinaa, muntwa adwo, nsamono nti, efisɛ wɔatwa afi mo anom.

⁶ Na ɛdɔm bi atu aba m’asase so, wɔn ho yɛ den na wɔn dodow nni ano; wɔn se te sɛ gyata se, na wɔwɔ gyatabere nnyepi.

⁷ Wɔasɛe me bobe pasaa, na wɔapompam me borɔdɔma abaa; wɔapompɔn ho hono agu, na n’abaa ho ahoa fitafita.

⁸ Twa adwo sɛ ababaa a ofura ayitam ma ne mmabaabere mu kunu.

⁹ Wɔatwa aduan ayɛyɛde ne ahwiesa afi AWURADE fi; na asɔfo, AWURADE asomfo no, di nkɔmmɔ.

¹⁰ Mfuw asɛe, asase di nkɔmmɔ, na aduan asɛe, nsamono ayow, ngo so atɔre.

¹¹ Akuafo, mo ani nwu, aturoyɛfo, awi ne atoko nti muntwa adwo, efisɛ mfuw mu nnuan asɛe.

¹² Obobe akisa, na borɔdɔma atwam, atea aba, abɛ nso ne akutuguaa; petee mu nnua nyinaa akisa, ampa, anika atu afi nnipa mma mu.

¹³ Asɔfo, mommɔ mo ho so na mommɔ bena, afɔremuka asomfo, muntwa adwo, me Nyankopɔn asomfo, mommra mmɛda ayitam mu anadwo nyinaa. Na aduan ayɛyɛde ne ahwiesa agyae mo Nyankopɔn fi ba.

¹⁴ Monhyɛ abuadadi kronkron, mompae asɔfo nhyiam, mommoa mpanyimfo ano, asase sofo nyinaa mmra AWURADE mo Nyankopɔn fi, na munsu mfrɛ AWURADE.

¹⁵ Ao, ɛda no! Na AWURADE da no abɛn, na ɛreba sɛ ɔsɛe tumi afi Otumfo nkyɛn.

¹⁶ So wɔantwa aduan amfi yɛn anim, na anigye ne ahosɛpɛw amfi yɛn Nyankopɔn fi anaa?

¹⁷ Aba a wɔadua aporɔw n’akofi mu, aduankora adan ada mpan, asan abubu, na awi asɛe.

¹⁸ Hwɛ sɛ mmoadoma penepene, anantwikuw rebrɛ, efisɛ wonni adidibea. Nguankuw nso ti ato.

¹⁹ Wo, AWURADE, na misu mefrɛ wo, efisɛ ogya ahyew sare so wura momono, na ogyaframa ahyew petee mu nnua nyinaa.

²⁰ Wuram mmoa nso repere frɛ wo, na nsuwansuwa ayoyow, na ogya ahyew sare so wura momono.