Yesaia 56 - KYERƐW KRONKRON

Aman nyinaa bɛyɛ AWURADE nkurɔfo

¹ Sɛ AWURADE se ni: Munni atemmu so, na monyɛ adetrenee, na me nkwagye reyɛ aba, na wɔrebeyi me trenee adi.

² Nhyira ne ɔdasani a ɔyɛ eyi, ne onipa ba a okura mu no, nea odi homeda a ongu ho fi na ɔhwɛ ne nsa na anyɛ bɔne biara no.

³ Na ɔnanani a ɔde ne ho abɛbata AWURADE ho no, mma ɔnnka sɛ: Otu na AWURADE betu me afi ne man mu; na mma ayitotoni nso nnka sɛ: Hwɛ, me de, meyɛ duwui.

⁴ Na sɛ AWURADE ka ni: Ayitotofo a wodi me homeda na wɔpaw ade a ɛsɔ m’ani na wokura m’apam mu no,

⁵ mɛma wɔn me fi ne m’afasu mu afa ne din a eye sen mmabanin ne mmabea; daa din a wɔrentwa nkyene na mede mɛma mo.

⁶ Na ananafo a wɔabɛbata AWURADE ho sɛ wɔresom no na wɔadɔ AWURADE din na wɔbɛyɛ no nkoa no, obiara a odi homeda a ongu ho fi ne wɔn a wokura n’apam mu no,

⁷ mede wɔn mɛba me bepɔw kronkron no so, na mama wɔn ani agye me mpaebɔ fi, wɔn hyew afɔre ne wɔn kum afɔre bɛsɔ m’ani, m’afɔremuka so; na me fi no, wɔbɛfrɛ no mpaebɔ fi ama aman nyinaa.

⁸ AWURADE Nyankopɔn a ɔboa Israel mpanyimfo ano no asɛm ni: Mɛkɔ so maboa nnipa ano mapae ɛno so maka wɔn a wɔaboa wɔn ano no ho.

Ɔman no sohwɛfo asotwe

⁹ Wuram mmoadoma a moyɛ keka nyinaa, mmoadoma a moyɛ keka wɔ kwae mu nyinaa mommra mmedidi hamham.

¹⁰ N’awɛmfo yɛ anifuraefo, wɔn nyinaa nnim de; wɔn nyinaa yɛ akraman mum, wontumi mmobom; wɔyɛ nnamukasafo deda hɔ, wɔtɔ nko.

¹¹ Na akraman no yɛ adifudepɛfo sɛ, wonnim ɔmee. Wɔyɛ nguanhwɛfo a wonni nhumu, wɔn nyinaa adannan wɔn ani akyerɛkyerɛ wɔn akwan so, obiara hwehwɛ ne mfaso, wɔn ankasa mfaso, obiako ne obiara.

¹² Wɔka sɛ: Mommra, mekɔfa nsa aba, na yɛawe mpahyewa, na ɔkyena bɛyɛ sɛ nnɛ, ɛbɛso aboro so pii.