Yesaia 52 - KYERƐW KRONKRON

AWURADE begye Yerusalem

¹ Sion, nyan ɛ, nyan ɛ! Hyɛ w’ahoɔden! Yerusalem, kurow kronkron, hyɛ w’anuonyam atade! Na momonotoni ne nea ne ho ntew bi renkɔ so nhyɛn wo mu bio.

² Yerusalem, poroporow wo ho mfutuma gu, sɔre, tena ase! Sion babea a wɔafa wo dommum, sansan wo kɔn mu nkyehama!

³ Na sɛ AWURADE se ni: Wɔantɔn mo annye hwee, na ɛnyɛ sika na wɔde begye mo.

⁴ Na sɛ AWURADE Nyankopɔn ka ni: Me man sian kɔɔ Misraim kan kɔyɛɛ hɔ ahɔho, na Asaria nso hyɛɛ wɔn so kwa.

⁵ Na afei, dɛn na mewɔ meyɛ wɔ ha, AWURADE asɛm ni, na wɔafa me man kwa yi? Wɔn a wodi wɔn so no teɛteɛm, AWURADE asɛm ni; na wɔka me din ho abususɛm daa yi, daa adesae.

⁶ Ne saa nti me man behu me din, ne saa nti da no ara wobehu sɛ me ara mene nea ɔka sɛ: Mini.

Wɔn a wɔagye wɔn no sanba

⁷ Nea ɔnam mmepɔw so ka asɛmpa no anan yɛ fɛ dɛn ara! Ɔka asomdwoesɛm, ɔka papa ho asɛmpa, ɔma wɔte nkwagye asɛm, na ɔka kyerɛ Sion sɛ: Wo Nyankopɔn di hene!

⁸ Tie! W’awɛmfo bom ma wɔn nne so wɔde ahurusi bom to dwom; efisɛ wɔn ani tua sɛ AWURADE resan aba Sion.

⁹ Yerusalem amamfo, mommom nto anigye dwom, na AWURADE akyekye ne man werɛ, wagye Yerusalem.

¹⁰ AWURADE ayi ne basa kronkron no ho, amanaman nyinaa anim, na asase ano nyinaa ahu yɛn Nyankopɔn nkwagye.

¹¹ Montwe mo ho, montwe mo ho mfi hɔ nkɔ, monnka ade a ɛho ntew; mumfi adi mfi ne mu, montew mo ho, mo a mosoa AWURADE nnwinne no.

¹² Na ɛnyɛ ɔhare so na mubefi adi, na ɛnyɛ aguan so na mobɛnantew, na AWURADE redi mo anim, na Israel Nyankopɔn abɔ mo kyidɔm.

Onyankopɔn akoa no amanehunu

¹³ Hwɛ, m’akoa bedi yiye, ɔbɛsɔre na wɔama no so na wakorɔn sɛ.

¹⁴ Sɛnea wo ho yɛɛ nnipa pii ahodwiriw no, esiane sɛ n’anim asɛe a ɛnte sɛ onipa de, na ne nipaban nte sɛ nnipa mma de bio no nti,

¹⁵ saa ara na ɔbɛma amanaman pii abobɔ piriw, na ahene bemuamua wɔn ano wɔ ne ho, efisɛ nea wɔnka nkyerɛɛ wɔn no, wohu, na nea wɔntee da no, wɔte ase.