Yesaia 40 - KYERƐW KRONKRON

AWURADE kyekye ne man werɛ

¹ Monkyekye, monkyekye me man werɛ, mo Nyankopɔn na ose.

² Monka abodwoesɛm nkyerɛ Yerusalem, na mommɔ no kaseɛ sɛ n’akode asa, sɛ wɔde ne mfomso akyɛ, sɛ ne bɔne nyinaa ho wanya AWURADE nsam mmɔho.

³ Obi nne teɛm sɛ: Mommɔ AWURADE kwan, sare so, monteɛ anwea pradada so tempɔn mma yɛn Nyankopɔn.

⁴ Wɔmmoma abon nyinaa so, na wɔmmrɛ mmepɔw ne nkoko nyinaa ase; na nea ɛyɛ afuafu nyɛ asasetaw, na abonkyiabonkyi nyɛ toromtorom.

⁵ Na AWURADE anuonyam beyi ne ho adi, na ɔhonam nyinaa abom ahu, efisɛ AWURADE ano na aka.

⁶ Ɛnne bi se: Teɛm! Na mise: Menteɛm dɛn? Ɔhonam nyinaa yɛ wura, na ne papa nyinaa te sɛ wuram nhwiren.

⁷ Wura guan, nhwiren twam, na AWURADE ahome huw fa so. Ampa, ɔman no yɛ wura.

⁸ Wura guan, nhwiren twam, na yɛn Nyankopɔn asɛm tim hɔ daa.

⁹ Foro kɔ bepɔw a ɛkorɔn so, O ɔsɛmpakafo Sion. Ma wo nne so ahoɔden so, O ɔsɛmpakafo Yerusalem. Ma so nsuro; ka kyerɛ Yuda nkurow sɛ: Hwɛ, mo Nyankopɔn ni.

¹⁰ Hwɛ, AWURADE Nyankopɔn de tumi reba, na ne basa bedi nim ama no; hwɛ, n’akatua ka no ho, na n’ananmuhyɛ di n’anim.

¹¹ Ɔbɛyɛn ne nguankuw sɛ oguanhwɛfo, obeturu nguammaa ne basa so, na wasoa wɔn ne kokom; nguan mmaatan no, ɔbɛka wɔn brɛoo.

Obiara ne AWURADE nsɛ

¹² Hena na ɔde ne nsayam asusuw nsu, na ɔto ɔsoro nsaama, na ɔde susukora hyɛ asase so mfutuma, na ɔkari mmepɔw nsenia mu ne nkoko nsenia nkora mu?

¹³ Hena na ɔteɛ AWURADE honhom so, na ɔfotufo bɛn na ɔma ohu ade?

¹⁴ Ɔne hena na atu agyina, na wama wahu biribi, na wakyerɛ no atemmu kwan, na wakyerɛ no nimdeɛ, na wama wahu nhumu kwan?

¹⁵ Hwɛ, amanaman te sɛ bokiti ho nsukoko a ɛresosɔ, na wobu wɔn sɛ nsenia mu mfutumawa bi. Hwɛ, ɔmoma mmepɔw so sɛ mfutuma fekɔfekɔ.

¹⁶ Na Lebanon nso hyew, na ne mmoadoma nso ɔhyew afɔre.

¹⁷ Amanaman nyinaa nyɛ hwee n’anim; obu wɔn sɛ ade a ɛnyɛ hwee ne adehunu.

¹⁸ Na hena ho na mode Nyankopɔn bɛto, na suban bɛn na mode besusuw no?

¹⁹ Ohoni de, odwumfo na ogu, na sikadwumfo de sika dura ho, na ɔde dwetɛ ntweaban gugu ho;

²⁰ nea ayɛyɛde abɔ no no paw dua a ɛmporɔw; ɔhwehwɛ odwumfo nyansafo fa, na wasen ohoni a ɛnkeka ne ho.

²¹ So munhui? So montee ɛ? So womfii mfiase nka nkyerɛɛ mo? So efi asase nnyinaso so, montee biribiara ase?

²² Ɔno na ɔte asase kontonkron so, na ɛsotefo te sɛ mmoadabi. Ɔno na ɔtrɛw soro mu sɛ twamtam, na ɔyere mu sɛ ntamadan a wɔtena mu.

²³ Ɔno na ɔma abirempɔn yɛ sɛ wɔnyɛ hwee, ɔdan asase so akannifo sɛ ahuhude.

²⁴ Wɔtɛw wɔn ara pɛ, woduaa wɔn ara pɛ, wɔn dua gyee asase mu ntini ara pɛ, na wahuw afa wɔn so ama wɔakisa na ahum asoa wɔn kɔ sɛ ntɛtɛwa.

²⁵ Na ɛhena ho na mode me bɛto na me ne no asɛ? Ɔkronkronni no na ose.

²⁶ Momma mo ani so nhwɛ ɔsoro, na monhwɛ nea ɔbɔɔ eyinom. Ɔno na obu wɔn dɔm ano yi wɔn adi, na ɔbobɔ wɔn nyinaa din frɛfrɛ wɔn; ne tumi dodow ne n’ahoɔden kɛse nti obiara nka akyiri.

²⁷ Ɛdɛn nti na, Yakob, woka, na Israel, wokasa sɛ: Me kwan ahintaw AWURADE, na me Nyankopɔn abu n’ani agu m’atemmu so?

²⁸ So wunhui? So wontee ɛ? AWURADE yɛ daa Nyankopɔn Ɔno na ɔbɔɔ asase awiei no. Ɔmmrɛ, na ɔmpa abaw; na ne nhumu mu nni ahwehwɛye.

²⁹ Ɔno na ɔma nea wabrɛ otumi, na ɔma nea onni home ahoɔden dɔɔso.

³⁰ Mmerante brɛ, na wɔpa abaw, na nkwankwaa hwehwe ase.

³¹ Na wɔn a wɔtwɛn AWURADE no benya ahoɔden foforo, wɔde ntaban bɛforo sɛ akɔre, wobetu mmirika, na wɔremmrɛ, wɔbɛnantew, na wɔrempa abaw.