Yesaia 38 - KYERƐW KRONKRON

Hesekia yare ne n’aseda dwom

¹ Ɛbere no mu no, Hesekia yaree owuyare, na Amos ba odiyifo Yesaia baa ne nkyɛn bɛka kyerɛɛ no sɛ: Sɛ AWURADE se ni: Hyɛ wo fi samansew, na worebewu, na worennya nkwa.

² Ɛnna Hesekia dan n’ani kyerɛɛ ɔfasu, na ɔbɔɔ AWURADE mpae sɛ:

³ Ao, AWURADE, kae sɛnea manantew w’anim nokware mu ne koma a ɛyɛ pɛ mu, na mayɛ nea eye w’ani so. Na Hesekia suu osu kɛse.

⁴ Ɛnna AWURADE asɛm baa Yesaia nkyɛn sɛ:

⁵ Kɔ na kɔka kyerɛ Hesekia sɛ: Sɛ AWURADE, w’agya Dawid Nyankopɔn, se ni: Mate wo mpaebɔ, mahu wo nusu, hwɛ, mede mfe dunum mɛto wo nna so,

⁶ na megye wo ne kurow yi afi Asaria hene nsam, na mabɔ kurow yi ho ban.

⁷ Na eyi nyɛ wo AWURADE nsam sɛnkyerɛnne, sɛ AWURADE bɛyɛ ade a waka no:

⁸ Hwɛ, merebɛsan owia dɔn so sunsuma a owia ma esianee Ahas owia dɔn so no mama akɔ akyiri nkyekyɛmu du. Na owia san n’akyi owia dɔn no so nkyekyem du a asian dedaw no.

⁹ Nsɛm a Yuda hene Hesekia, a ɔyaree na onyaa ne yare mu nkwa no kyerɛwee ni:

¹⁰ Me de, mekae sɛ: Me nna mfinimfini na merekɔ asaman abobow ano, wɔregye me nsam me mfe nkae.

¹¹ Mise: Merenhu AWURADE bio, wɔ ateasefo asase so; merenhu nnipa bio, wɔn a wɔte asaman no mu.

¹² Wɔayi me tenabea ma atu afi me ho kɔ sɛ oguanhwɛfo ntamadan, mabobɔw me nkwa sɛ ɔtamanwemfo; worebetwa me afi asadua no mu: Worewie me da koro adesae.

¹³ Midwudwoo me ho mikosii anɔpa, obubuu me nnompe nyinaa sɛ gyata: Worewie me da koro adesae.

¹⁴ Misii apini sɛ asomfena, sɛ asukɔnkɔn, midii nkɔmmɔ sɛ aborɔnoma; m’aniwa yɛɛ siamoo hwɛɛ ɔsoro sɛ: Awurade, me ho kyere me, di ma me!

¹⁵ Dɛn na menka? Wakasa akyerɛ me na wayɛ. M’ani asare dwe, me kra awerɛhow no nti.

¹⁶ O Awurade, ɛno so na nnipa nam tena ase, na ɛno nkutoo mu na me honhom nkwa wɔ: Ɛnne na ma me ho nsan, na ma minnya nkwa.

¹⁷ Hwɛ, sɛ na m’asomdwoe nti, na wo na woayi me kra afi ɔsɛe amoa mu de afam wo ho, efisɛ wotow me bɔne nyinaa guu w’akyi.

¹⁸ Na ɛnyɛ asaman na ɛda wo ase, ɛnyɛ owu na eyi wo ayɛ. Wɔn a wosian kɔ amoa mu no ntwɛn wo nokware;

¹⁹ Ɔteasefo, ɔteasefo na ɔda wo ase, sɛ meyɛ nnɛ yi; agya ma ne mma hu wo nokware.

²⁰ AWURADE begye me nkwa, na yɛbɛbɔ sanku yɛn nkwa nna nyinaa, wɔ AWURADE fi.

²¹ Afei Yesaia kae sɛ wɔmfa borɔdɔma tɔw ntare pɔmpɔ no so, na obenya ahoɔden.

²² Na Hesekia nso kae sɛ: Dɛn ne sɛnkyerɛnne sɛ mɛkɔ AWURADE fi?