Yesaia 30 - KYERƐW KRONKRON

Mommfa mo ho nnto Misraim so

¹ Wonnue, mma atuatewfo, AWURADE na ose, wɔn a wodi agyinatusɛm so, na emfi me, na wɔyɛ nkabom bi, na ɛnyɛ me honhom so sɛ wɔde bɔne bɛka bɔne ho no.

² Wosim kɔ Misraim a wɔammisa m’anom asɛm, sɛ wokotweri Farao ahoɔden, na wɔakɔdɔ Misraim nwini.

³ Ne saa nti Farao ahoɔden bɛdan mo aniwu, na Misraim nwini mu guankɔ ayɛ mo ahohora.

⁴ Na Yuda asafohene wɔ Soan, na wɔn abɔfo adu Hanes;

⁵ wɔn nyinaa ani bewu ɔman a wɔn ho remma wɔn mfaso. Wɔrenyɛ wɔn ɔboa anaa mfaso bi, na mmom aniwu ne ahohora.

⁶ Anafo fam mmoa ho atemmusɛm. Wɔfa ahohia ne ahokyere asase so, nea gyatabere ne gyatanini wɔ no, nea ahurutoa ne ɔwɔ a otu wɔ no, wɔde wɔn nneɛma agugu mfurum akyi, ne wɔn akorade nso yoma akyi apɔw so, wɔde rekɔ ɔman a wɔn ho remma wɔn mfaso bi no nkyɛn.

⁷ Efisɛ Misraim boa yɛ adehuhuw ne adehunu, enti na mafrɛ no Rahab a ase ne: Hooyɛfo, a wɔte hɔ dinn.

Mma asoɔdenfo no

⁸ Afei kɔ na kyerɛw gu ɔpon bi so ma wɔn, na kurukyerɛw hyɛ nhoma mu, na ɛntena hɔ nkosi daa daa, na ɛnyɛ adansedi afebɔɔ

⁹ Na wɔyɛ atuatew man, mma atorofo, mma a wɔmpɛ sɛ wotie AWURADE mmara.

¹⁰ Wɔka kyerɛ adehufo sɛ: Munnhu ade! Na wɔka kyerɛ adiyifo nso sɛ: Monnhyɛ yɛn nea ɛteɛ ho nkɔm! Monka adɛfɛdɛfɛsɛm nkyerɛ yɛn, na monhyɛ nnaadaasɛm ho nkɔm!

¹¹ Momman mfi ɔkwan no so, monkwae ɔtempɔn no, momma Israel kronkronni no nyera yɛn ani so.

¹² Enti, sɛ Israel kronkronni no ka ni: Esiane sɛ asɛm yi afono mo na mo ani da ɔhyɛ ne nkontompo so na mode mo ho to so nti,

¹³ amumɔyɛ yi bɛdan mo sɛ mpaepae wɔ ɔfasu a ɛkorɔn na akurum na ɛreyɛ ahwe ase mu, na ne bu ba mpofirim, afrɛso.

¹⁴ Na ɔbɛbɔ ɔman no sɛ ɔnwemfo ahina a wɔdwerɛw no dwerɛbee a ebi nka, na wonnya n’asinasin mu fɛre a wɔde betu muka mu gya anaasɛ wɔde bɛsaw abura mu nsu.

¹⁵ Na sɛ AWURADE, Israel kronkronni no se ni: Sanba ne brɛooyɛ mu na wobegye mo nkwa, kommyɛ ne anidaso mu na mo mmaninyɛ bɛtena, nanso moampene;

¹⁶ na mokae sɛ: Daabi, na apɔnkɔ so na yɛbɛtena aguan. Enti aguan na mubeguan! Na mmoa ahoɔharefo so na yɛbɛtena akɔ. Enti wɔn a wotiw mo no ho bɛyɛ hare!

¹⁷ Nnipa apem prɛko beguan obiakofo huyi ano; nnipa baanum huyi ano na mubeguan akosi sɛ mobɛka sɛ frankaa dua a esi bepɔw atifi, sɛnkyerɛnne a esi koko so.

Yerusalem daakye ahotɔ

¹⁸ Na enti AWURADE twɛn ansa na wadom mo, na ɛno nti na ɔma ne ho so ansa na wahu mo mmɔbɔ, na atemmu Nyankopɔn ne AWURADE, nhyira ne wɔn a wɔtwɛn no nyinaa.

¹⁹ Na ɔman no bɛtena Sion, wɔ Yerusalem; na worensu bio; ɔdom na ɔbɛdom wo atie wo nteɛm no; ɔte ara pɛ a, obegye wo so.

²⁰ Na ɛwom sɛ Awurade bɛma mo ahohia mu aduan ne ahoguan mu nsu de, nanso w’akyerɛkyerɛfo remfa wɔn ho nhintaw bio, na mmom w’aniwa behu w’akyerɛkyerɛfo no;

²¹ na w’aso nso bɛte w’akyi asɛm bi sɛ: Eyi ne kwan, sɛ mofa nifa oo, mofa benkum oo, monnantew so.

²² Na mubegu wo dwetɛ ahoni nnuraho ne wo sika agude nkataho no ho fi; wobɛtow agu sɛ asabutam, wobɛka akyerɛ no sɛ: Fi hɔ!

²³ Na ɔbɛma osu agu w’aba a woagu ɛfam ne asase nnɔbae aduan so, na ayɛ aduan pa sɔɔsɔɔ. Wo mmoakuw bedidi da no, adidibea a ɛtrɛw so;

²⁴ na anantwi ne mfurum mma a wɔyɛ mfuw mu adwuma no bedi afrafraduan pa a wɔde sɔnwee ne apaawa ahuw so.

²⁵ Na mmepɔw asorɔnsorɔn ne nkoko a ɛkorɔn nyinaa so no, asuasu ne nsubɔnten bɛsen hɔ, okunkɛse da a aban atenten bɛhwehwe ase no.

²⁶ Na ɔsram hann bɛyɛ sɛ owia hann, na owia hann bɛyɛ mmɔho asɔn, sɛ nnansɔn hann, ɛda a AWURADE bɛkyekyere ne man bubu na wasa ne hwe ano akuru no.

Atamfo no sɛe

²⁷ Hwɛ, AWURADE din fi akyirikyiri reba, n’abufuw redɛw wɔ owusiw kumɔnn mu, abohuru ayɛ n’anom ma, na ne tɛkrɛma te sɛ ogya a ɛhyew ade.

²⁸ Na n’ahome te sɛ asu a eyiri bedu kɔn mu, na ɔde hunuyɛ sɔnee ason amanaman so, na ɔde ntwɛtwɛdɛwɔ nnareka ato aman anom.

²⁹ Mobɛto dwom sɛ afahyɛ kronkron anadwo no, na mo bo bɛtɔ mo yam sɛ wɔn a wɔde atɛntɛbɛn nnwom rekɔ AWURADE bepɔw so, Israel botan no nkyɛn.

³⁰ Na AWURADE bɛma wɔate ne nne kɛseyɛ, na wama wɔahu ne nsa a ɛresian, abufuw ahomegu ne adehyew gyaframa, osu babababa ne osu yɔɔ ne amparuwbo mu.

³¹ Na AWURADE nne nti Asaria ho bɛpopo, ɔde abaa bɛhwe no,

³² na hyɛbea abaa a AWURADE bɛma asi no so no bɛka no, mpintin ne asanku ano, na nsa wosow na ɔde ne no bɛko.

³³ Wofi teteete na asiesie akyide hyewbea no; ɔhene no na wɔasiesie ama no, emu dɔ, ɛtrɛw, ne ntannaa wɔ ogya ne nnyentia pii, AWURADE ahome bɛsɔ ano sɛ sufre asubɔnten.