Yesaia 2 - KYERƐW KRONKRON

Daadaa asomdwoe

¹ Asɛm a Amos ba Yesaia hui Yuda ne Yerusalem ho ni:

² Na nna a ɛreba no mu no, AWURADE fi bepɔw no betim hɔ ataa mmepɔw atifi, na wɔama so asen nkoko nyinaa, na amanaman nyinaa asen yuu aba ho.

³ Na aman pii bɛkɔ akɔka sɛ: Mommra mma yɛnkɔ AWURADE bepɔw so, nkɔ Yakob Nyankopɔn fi, na ɔnkyerɛ yɛn n’akwan, na yɛnnantew n’atempɔn so: Na Sion na mmara befi, na AWURADE asɛm afi Yerusalem.

⁴ Na obebu amanaman no ntam atɛn, na ɔbɛka aman bebree ntam asɛm, na wɔde wɔn nkrante abobɔ nsɔw, ne wɔn mpeaw ayeyɛ nnare; ɔman bi remma afoa so nhyɛ ɔman bi, na wɔrensua akodi bio.

Ahantan so atemmu

⁵ O Yakob fi, mommra mma yɛnkɔ, na yɛnkɔnantew AWURADE hann no mu.

⁶ Na woagyaw wo man, O Yakob fi, efisɛ apuei ntafowayifo ayɛ wɔn amaama, ɛne nkɔmhyɛfo, sɛ Filistifo, na wɔne ananafo fa ayɔnko.

⁷ Dwetɛ ne sika ayɛ wɔn asase so ma, na wɔn akorade nni ano; apɔnkɔ ahyɛ wɔn asase so ma, na wɔn nteaseɛnam nni ano.

⁸ Abosonhuhuw nso ahyehyɛ wɔn asase so ma, wɔn nsa ano nnwuma na wɔsom, ade a wɔn nsatea ayɛ.

⁹ Enti wɔbrɛ nnipa ase, na wɔde mmarima hwe fam: Mfa mfiri wɔn.

¹⁰ AWURADE ho hu ne ne kɛseyɛ anuonyam nti, hyɛn ɔbotan mu, na fa wo ho kora mfutuma mu.

¹¹ Nnipa ahantan aniwa bɛbrɛ ase, na mmarima ahomaso ahwe fam, na wɔama AWURADE nko so ɛda no.

¹² Na asafo AWURADE da bi wɔ hɔ a ɛbɛba atia nea ɛkorɔn na ɛyɛ sorɔnsorɔn nyinaa, ne nea wɔama so nyinaa so,

¹³ na ɛbɛba atia Lebanon nkyeneduru a ɛware na ɛkorɔn nyinaa, ne Basan nnupɔn nyinaa so,

¹⁴ ne mmepɔw atenten nyinaa, ne nkoko a wɔama so nyinaa so,

¹⁵ ne abantenten a ɛkorɔn nyinaa, ne afasu a ɛyɛ den nyinaa so,

¹⁶ ne Tarsis ahyɛn nyinaa ne ahwɛde a ɛyɛ fɛ nyinaa so.

¹⁷ Na wɔbɛbrɛ onipa ahantan ase, na nnipa ahokyerɛ aba fam, na wɔama AWURADE nko so ɛda no.

¹⁸ Na abosonhuhuw no betu ayera koraa.

¹⁹ Monhyɛn abodan ne abotan mu, ntokuru ne fam amoa mu, afi AWURADE ho hu anim, ne ne kɛseyɛ anuonyam no ho, da a ɔbɛsɔre abɛwosow asase no.

²⁰ Ɛda no nnipa bɛtow ne dwetɛ abosonhuhuw ne ne sika abosonhuhuw a wɔyɛ maa no a ɔresom no no akyene ama akisi ne mpan,

²¹ na wahyɛn abotan ntokuru ne abo mpaepae mu, afi AWURADE ho hu anim, ne ne kɛseyɛ anuonyam no ho, da a ɔbɛsɔre abɛwosow asase no.

²² Montwe mo ho mfi onipa a ahome wɔ ne hwenem no ho, na wobu no dɛn koraa?