Yesaia 17 - KYERƐW KRONKRON

Damasko ho atemmusɛm

¹ Damasko ho atemmusɛm. Hwɛ, Damasko renyɛ ahenkurow bio, na ɛbɛyɛ afabo kuw.

² Wɔagyaw Aroer nkurow, mmoakuw afa na wobutubutuw hɔ, na nea obetu wɔn nni hɔ.

³ Na wɔbɛsɛe Efraim abandennen ne Damasko ahenni, na Siria nkae bɛyɛ sɛ Israelfo anuonyam no: Asafo AWURADE na ose.

Israel ho atemmusɛm

⁴ Ɛda no, Yakob anuonyam no besua, na ne honam a adɔ srade no betwam;

⁵ na ɛbɛyɛ sɛ otwafo buma awi a esisi hɔ, na ɔde ne nsa twa mmɛtem no; na ɛbɛyɛ sɛ nea odi awi mmɛtem mu mpɛpɛwa Refaim bon no mu.

⁶ Nanso ɛbɛka wɔn mu mpɛpɛwa no bi, sɛ ngo dua porow mu a aba abien anaa abiɛsa wɔ ntɛntɛnoa, anan anaa anum wɔ n’abaa a asow yiye no so no: AWURADE, Israel Nyankopɔn, na ose.

⁷ Ɛda no na onipa ani begyina ne yɛfo, na n’aniwa bɛhwɛ Israel kronkronni no;

⁸ na ɔrenhwɛ afɔremuka a ɛyɛ ne nsa ano adwuma no, na Asera nnua ne owia adum a ne nsatea ayɛ no, ɔremmu bio.

⁹ Ɛda no na ne nkurow a ɛyɛ den no bɛyɛ sɛ Hewifo ne Amorifo nkurow a wɔagyaw wɔ kwae mu ne mmepɔw atifi a wogyawee wɔ Israelfo anim no, na ayeyɛ akurofo.

¹⁰ Efisɛ wo werɛ afi wo nkwagye Nyankopɔn, na w’ahoɔden botan no, wonkae no; enti wudua nnua afɛfɛ na wotɛw ananafo nyame som;

¹¹ woma efifi da a wuduae no, na anɔpa a wuduae no ara ɛyɛ frɔmfrɔm, woma egu nhwiren, nanso ɛso aba no betu akɔ, amane ne yaw a enni awiei.

Amanaman po no huuyɛ

¹² Ao, aman bebree huuyɛ, wɔyɛ huu sɛ ɛpo huuyɛ Ao, aman hooyɛ, wɔyɛ hoo sɛ nsu a ɛyɛ den hooyɛ!

¹³ Aman no yɛ hoo sɛ nsu bebree hooyɛ, ɔka wɔn ma woguan kɔ akyirikyiri, na wotiw wɔn sɛ mmepɔw so ntɛtɛwa, mframa anim, ne mframaden ne mu tutuw, ahum anim.

¹⁴ Anwummere no, na hwɛ, piriwbɔ aba; ade nnya nkyee no, na wonni hɔ bio. Eyi ne yɛn dwowtwafo kyɛfa ne yɛn afowfo ade a wonya.