Yesaia 13 - KYERƐW KRONKRON

Babel ho atemmusɛm

¹ Babel ho atemmusɛm a Amos ba Yesaia hui ni:

² Munsi frankaa bepɔw petee so, momma mo nne so mma wɔn, munhinhim mo nsa, na wɔnhyɛn mmapɔmma abobow mu.

³ M’ankasa na mahyɛ m’ahotewfo, na mafrɛ me nnɔmmarima nso mama m’abufuw, wɔn a wodi me kɛseyɛ ho ahurusi no.

⁴ Tie osebɔ gyegyeegye wɔ mmepɔw so, sɛ nkurɔfo bebree nne te no. Ɛte sɛ amanaman a wɔboaboa wɔn ho ano, ahenni horow huuyɛ gyegyeegye, asafo AWURADE rehwehwɛ asraafo akɔ sa.

⁵ Wofi akyirikyiri asase so ne ɔsoro awiei reba, AWURADE ne n’abufuhyew akode no, sɛ ɔrebɛsɛe asase nyinaa.

⁶ Munsu na AWURADE da no abɛn; ɛreba sɛ ɔsɛe a efi Otumfo no.

⁷ Enti nsa nyinaa mu begow, na ɔdesani biara koma bebubu;

⁸ na wɔn ho bedwiriw wɔn, nketenkete ne awerɛhow bekita wɔn, wobehu yaw sɛ ɔbea a ɔreko awo; wɔbɛhwɛ wɔn ho wɔn ho anim haa, wɔn anim bɛyɛ sɛ ohufo anim.

⁹ Hwɛ, AWURADE da no reba, atirimmɔden ne anibere ne abufuhyew, sɛ ɔrebɛdan asase no afo, na wasɛe ɛso nnebɔneyɛfo afi so.

¹⁰ Na ɔsoro nsoromma ne emu akunini renhyerɛn, owia beduru sum n’adifi mu, na ɔsram nso renharan.

¹¹ Na mɛba mabɛtwe wiase aso, ne bɔne ho, ne abɔnefo aso, wɔn amumɔyɛ ho, na mama ahantanfo ahomaso no to atwa, na ahupoofo ahokyerɛ abrɛ ase;

¹² mɛma ɔdasani ho ayɛ na asen sika amapa, na onipa sen Ofir sika kɔkɔɔ.

¹³ Enti mɛma ɔsoro awosow, na asase ahinhim afi ne sibea, asafo AWURADE abufufa no ano ne n’abufuhyew da no nti.

¹⁴ Na wɔbɛdannan wɔn ho akokɔ wɔn nkurɔfo nkyɛn, na wɔaguanguan akokɔ wɔn nsaase so sɛ ɔwansan a ɔbɔmmɔfo taa no, ne nguan a obi mmoa wɔn ano.

¹⁵ Obiara a wobehu no no, wobehwirew no mu, na obiara a wɔbɛkyere no, no bɛtɔ nkrante ano;

¹⁶ na wɔbɛposa wɔn mmotafowa, wɔn anim, wɔbɛfofow wɔn afi, na wɔabobɔ wɔn yerenom adapaa.

¹⁷ Hwɛ, merehwanyan Mediafo mahyɛ wɔn, nnipa a wommu dwetɛ, na sika nso, wɔnhwehwɛ;

¹⁸ wɔn mmɛmma bɛbobɔ mmerante, wɔn yam renhyehye wɔn ɔyafunum mma po ho, na wɔn aniwa renkyɛe mmofra so.

¹⁹ Na Babel a ɛyɛ ahenni mu kunini, ne Kaldeafo kɛseyɛ anuonyam no, ɛbɛyɛ sɛ Sodom ne Gomora butuw a Onyankopɔn butuw wɔn no.

²⁰ Obi rentena mu da biara da, na obi renkɔtena hɔ, awo ntoatoaso a edidi so mu, na Arabiani biara rensi ntamadan hɔ, na nguanhwɛfo nso remma wɔn mmoa mmutuw hɔ;

²¹ na sare so mmoa a wɔyɛ keka na wɔbɛdeda hɔ, na mpatu bɛyɛ wɔn adan amaama, na nsohori nso bɛtena hɔ, na sasabonsam asaw hɔnom;

²² na nkuntumpaa besu n’aban mu, ne sakraman nso, anigye aban no mu. Na ne bere abɛn a ɛreyɛ aba, na ne nna renkyɛ bio.