Yeremia 5 - KYERƐW KRONKRON

Ɔsɛe ne asotwe

¹ Muntutu mmirika nkyin Yerusalem mmorɔn so, na monhwɛ ɛ, na munhu, na monhwehwɛ ne mmɔnten so, sɛ mubehu onipa bi, sɛ obi wɔ hɔ a odi asɛntrenee na ɔhwehwɛ nokware, na memfa nkyɛ no.

² Ɛwom sɛ wɔka sɛ: Sɛ AWURADE te ase yi de, nanso ntanhunu na wɔkeka.

³ O AWURADE, so w’aniwa nsa nokware? Wobobɔ wɔn, na ɛnte wɔn; wodwɛre wɔn, wɔpo nteɛso; wɔahyɛ wɔn ani den sen ɔbotan, wɔmpɛ sɛ wonu wɔn ho.

⁴ Ɛnna mise: Eyinom yɛ mmɔborɔfo, nkwaseafo ne wɔn, efisɛ wonnim AWURADE kwan ne wɔn Nyankopɔn mmara.

⁵ Ma menkɔ nnipa akɛse no nkyɛn na menkasa nkyerɛ wɔn, efisɛ wɔn na wonim AWURADE akwan ne wɔn Nyankopɔn mmara no. Nanso wɔn nyinaa abubu kɔndua no atetew nkyehama no.

⁶ Ne saa nti kwae mu gyata bekum wɔn, anwea pradada so habɔdɔm bɛsɛe wɔn, ɔsebɔ rewɛn wɔn nkurow ho. Obiara a obefi adi no, wɔbɛtetew no asinasin; efisɛ wɔn mmarato dɔɔso, na wɔn akyirisan no so.

⁷ Eyi de, ɛbɛyɛ dɛn na mede bɛkyɛ wɔn? Wo mma agyaw me, na wɔkeka wɔn a wɔnyɛ anyame ho ntam. Na mema wɔmee mpo a, wɔsɛe aware ara, na wɔbɔ yuu kɔ aguaman fi.

⁸ Wɔte sɛ apɔnkɔnini abran a wɔbɔ anworaman, wɔbobɔ wɔn mfɛfo yerenom ho mmɔn.

⁹ So merentua eyinom so ka? AWURADE asɛm ni, anaasɛ merenni were ɔman a ɛte sɛɛ so anaa?

¹⁰ Momforo n’afasu na monsɛe no, nanso monnsɛe no nnwie. Mompempan n’abaa, na wɔnyɛ AWURADE dea.

¹¹ Efisɛ Israel fi ne Yuda fi atwa me nkontompo, AWURADE asɛm ni.

¹² Wɔapa AWURADE akyi, na wɔka sɛ: Ɛnyɛ ɔno nen; na bɔne bi remma yɛn so, na yɛrenhu afoa ne ɔkɔm.

¹³ Na adiyifo no nyɛ hwee sɛ mframa na asɛm bi nni wɔn anom; sɛnea ɛbɛyɛ wɔn ne no.

¹⁴ Enti sɛ AWURADE, asafo Nyankopɔn no, se ni: Esiane sɛ mokaa saa asɛm yi nti, hwɛ, merema me nsɛm ayɛ ogya w’anom, na ɔman yi adan nnyina, na ahyew wɔn.

¹⁵ Hwɛ, mede ɔman bi mifi akyirikyiri mereba mo so, Israel fi, AWURADE asɛm ni; ɔman a wɔyɛ ɔmantease, ɔman a wofi teteete, ɔman a wunnim wɔn kasa, na wonte nea wɔka no ase.

¹⁶ Wɔn agyan kotoku te sɛ ɔdamoa a ano da hɔ, wɔn nyinaa yɛ nnɔmmarima.

¹⁷ Na wobedi wo nnɔbae ne w’aduan a anka wo mmammarima ne wo mmabea bedi, na wobedi wo nguan ne w’anantwi, wobedi wo bobe ne w’aborɔdɔma, na wɔde afoa abobɔ wo nkurow a ɛyɛ den a wode wo ho too so no.

¹⁸ Nanso saa nna no mu nso, AWURADE asɛm ni, merensɛe mo minwie.

¹⁹ Na sɛ moka sɛ: Ɛdɛn nti na AWURADE yɛn Nyankopɔn ayɛ yɛn saa ade yi nyinaa a? Wobɛka akyerɛ wɔn sɛ: Sɛnea moagyaw me, na moakɔsom amannɔne anyame mo asase so no, saa ara nso na mobɛsom ahɔho, asase bi a ɛnyɛ mo de so.

Nkwaseasɛm ne nnebɔne

²⁰ Monka eyi Yakob fi, na momma wɔnte Yuda sɛ:

²¹ Muntie eyi ɛ, ɔman nkwaseafo a wonni ti, wɔwɔ aniwa, na wonhu ade, wɔwɔ aso, na wɔnte asɛm.

²² So munsuro me? AWURADE asɛm ni; anaasɛ mo bo ntu m’anim? Me a mede anwea mitwa po ano hye, daa ɔhye a entumi ntra; na sɛ mpo n’asorɔkye bɔ a, entumi no, na sɛ ehuru sɛ dɛn ara a, entumi ntra.

²³ Na ɔman yi wɔ atuatew ne asoɔden koma; wɔtew atua, na wɔkɔ so ara;

²⁴ na wɔnka wɔn koma mu sɛ: Momma yensuro AWURADE, yɛn Nyankopɔn, na ɔno na ɔma asusow ne adonsu tɔ ne bere mu, ɔhwɛ twabere adapɛn a wahyɛ no so ma yɛn.

²⁵ Mo amumɔyɛ na ama eyinom adan, na mo bɔne na ama adepa abɔ mo.

²⁶ Efisɛ wohu abɔnefo me man mu; wɔtetɛw sɛ nea nnomaayifo butubutuw; wosunsum mfiri yiyi nnipa.

²⁷ Sɛ nnomaa hyɛ kyerɛnkyɛ ma no, sɛ nsisi ayeyɛ wɔn afi mu amaama ne no; enti wɔayɛ akɛse na wɔanya wɔn ho.

²⁸ Wɔadodɔ srade, wɔn ho ayɛ srasra; nso wodi nsɛmmɔne tra so; wommu atɛntrenee, wonni nyisaa asɛm, na ama wɔadi yiye; na ahiafo nso, wommu atɛn mma wɔn.

²⁹ So meremmetua eyinom so ka? AWURADE asɛm ni; anaasɛ me kra rentɔ ɔman a ɛte sɛɛ yi so were?

³⁰ Ahobowde ne ahodwiriwde na wɔayɛ no asase no so.

³¹ Adiyifo hyɛ nkɔntoro, na asɔfo nam wɔn so di wɔn koko so asɛm; me man nso pɛ no sa, nanso n’awiei no, mobɛyɛ no dɛn?