Yeremia 43 - KYERƐW KRONKRON

¹ Na Yeremia kaa AWURADE wɔn Nyankopɔn nsɛm a AWURADE wɔn Nyankopɔn de somaa no wɔn nkyɛn no nyinaa kyerɛɛ ɔman no nyinaa wiei no,

² Hosaia ba Asaria ne Karea ba Yohanan ne mmarima ahokyerɛfo no nyinaa ka kyerɛɛ Yeremia sɛ: Atosɛm na woreka yi, AWURADE yɛn Nyankopɔn nsomaa wo sɛ ka sɛ: Monnkɔ Misraim nnkɔsoɛ hɔ ahɔho, ɛ!

³ Na Neria ba Baruk na opiapia wo hyɛ yɛn, sɛnea ɛbɛyɛ na ɔde yɛn ahyɛ Kaldeafo nsa, na wɔakum yɛn, na wɔatu yɛn akɔ Babel.

⁴ Na Karea ba Yohanan ne dɔm asafohene no nyinaa ne ɔman no nyinaa antie AWURADE antena Yuda asase so.

⁵ Na Karea ba Yohanan ne dɔm asafohene no nyinaa faa Yuda nkae nyinaa a wɔsan fii amanaman nyinaa a wɔpansam wɔn kɔɔ hɔ no bae sɛ wɔbɛsoɛ Yudafo asase so,

⁶ mmarima ne mmea ne mmofra ne ɔhene mmabea ne nnipa a ankɔbeahene Nebusaradan gyaw wɔn Safan ba Ahikam ba Gedalia nkyɛn no nyinaa ne odiyifo Yeremia ne Neria ba Baruk,

⁷ na wɔde wɔn kɔɔ Misraim asase so, efisɛ wɔantie AWURADE; na wɔbaa Tahpanhes.

Yeremia hyɛ nkɔm sɛ Nebukadnesar bɛhyɛn Misraim

⁸ Ɛnna AWURADE asɛm baa Yeremia nkyɛn, Tahpanhes sɛ:

⁹ Tase abo akɛse, na fa hyehyɛ dɔte mu, ntayaa fononoo a ɛwɔ Farao fi pon ano no mu, Tahpanhes, Yudafo mmarima no anim,

¹⁰ na ka kyerɛ wɔn sɛ: Sɛ asafo AWURADE, Israel Nyankopɔn, se ni: Hwɛ, meresoma makɔfa m’akoa, Babel hene Nebukadnesar, na mede n’agua mabesi abo yi a mede makora yi so, na watrɛw n’akatamanso mu wɔ hɔ.

¹¹ Na ɔbɛba abɛbɔ Misraim asase, nea ɔsɛ owu no bewu, na nea ɔsɛ dommumfa no, wɔbɛfa no dommum, na nea ɔsɛ afoa no, afoa bɛka no.

¹² Na mɛto Misraim anyame afi mu gya, na wahyew wɔn asoa wɔn nnommum, na wafura Misraim asase, sɛnea oguanhwɛfo fura ne ntama, na wafi hɔ asomdwoe mu akɔ.

¹³ Na obebubu Bet-semes adum a ɛwɔ Misraim asase so no, na ɔde ogya ahyew Misraim anyame afi no.