Yeremia 29 - KYERƐW KRONKRON

Nhoma a Yeremia de kɔma atukɔfo no

¹ Nso odiyifo Yeremia kyerɛw nsɛm yi hyɛɛ nhoma mu de fi Yerusalem menaa atukɔfo no mu mpanyimfo nkae ne asɔfo ne adiyifo ne nkurɔfo a Babel hene Nebukadnesar tuu wɔn fii Yerusalem kɔɔ Babel no nyinaa,

² bere a ɔhene Yekonia ne ɔhene ne na ne mpiafo ne Yuda ne Yerusalem mmapɔmma ne adwumfo ne atomfo fii Yerusalem kɔe no;

³ ɔde menaa Safan ba Elasa ne Hilkia ba Gemaria a Yuda hene Sedekia somaa wɔn kɔɔ Babel hene Nebukadnesar nkyɛn Babel no; ese:

⁴ Sɛɛ na asafo AWURADE, Israel Nyankopɔn ka kyerɛ atukɔfo a mema wotuu wɔn fii Yerusalem kɔɔ Babel no nyinaa:

⁵ Munsisi adan na montena mu, na monyɛ nturo na munni mu aba.

⁶ Monwareware yerenom, na monwowo mmabanin ne mmabea, na monwareware yerenom mma mo mma, na momfa mo mmabea mmoma okununom aware, na wɔnwowo mmabanin ne mmabea, na monnɔɔso ɛhɔnom na moansua.

⁷ Na monhwehwɛ kurow a mema wotuu mo kɔɔ hɔ no yiyedi, na mommɔ AWURADE mpae mma no; na ne yiyedi mu na mubedi yiye.

⁸ Na sɛ asafo AWURADE, Israel Nyankopɔn, se ni: Mommma mo adiyifo a wɔwɔ mo mu no ne mo nkɔmhyɛfo no nnsisi mo, na munntie mo adae a mososo no,

⁹ na atoro mu na wɔde me din hyɛ mo nkɔm, mensomaa wɔn ɛ, AWURADE asɛm ni.

¹⁰ Na sɛ AWURADE se ni: Mfirihyia aduɔsɔn nya du ma Babel a, mɛba mabɛhwɛ mo, na mama m’asɛmpa no aba mu ama mo, sɛ mede mo mɛsan aba ha yi.

¹¹ Na me de, minim adwene ko a meredwen mo ho, AWURADE asɛm ni, asomdwoe adwene, na ɛnyɛ bɔne de, sɛ merema mo awiei pa ne anidaso.

¹² Na mobɛfrɛ me, na moakɔ akɔbɔ me mpae, na matie mo;

¹³ na mobɛhwehwɛ me ahu me, efisɛ mode mo koma nyinaa bɛhwehwɛ m’akyi kwan.

¹⁴ Na mɛma moahu me, AWURADE asɛm ni. Na mede mo nnommum mɛsan aba, na maboa mo ano afi amanaman a mapam mo akɔ hɔ no nyinaa mu, AWURADE asɛm ni, na mede mo mɛsan aba nea mema wotuu mo fii hɔ kɔe no.

¹⁵ Esiane sɛ moka sɛ: AWURADE ama adiyifo so ama yɛn Babel nti,

¹⁶ sɛɛ na AWURADE ka ɔhene a ɔte Dawid agua so no ne ɔman a wɔte kurow yi mu, mo nuanom a wɔne mo amfi ankɔ tukɔ no mu nyinaa ho,

¹⁷ sɛ asafo AWURADE se ni: Hwɛ, merema afoa, ɔkɔm ne owuyare aba wɔn mu, na mama wɔadan sɛ mmorɔdɔma porɔwee a oye a enye nti wontumi nni.

¹⁸ Na mede afoa, ɔkɔm ne owuyare metiw wɔn, na mama wɔaguan wɔn ho asase so ahenni nyinaa mu, na wɔadan nnome ne ahodwiriwde ne fɛwdi ne ahohorade, amanaman a mapam wɔn akɔ hɔ no mu,

¹⁹ efisɛ wɔantie me nsɛm, AWURADE asɛm ni, sɛ mesomaa me nkoa adiyifo baa wɔn nkyɛn, mituaa ahema mesomaa wɔn, nso moantie, AWURADE asɛm ni.

²⁰ Enti muntie AWURADE asɛm, mo atukɔfo a mama moafi Yerusalem akɔ Babel no nyinaa.

²¹ Sɛɛ na asafo AWURADE, Israel Nyankopɔn ka, Kolaia ba Ahab ne Maaseia ba Sedekia a wɔde me din hyɛ mo nkɔntoro no ho: Hwɛ, mede wɔn merehyɛ Babel hene Nebukadnesar nsa, na wakum wɔn mo anim.

²² Na wɔmfa wɔn nyɛ nnome, Yuda atukɔfo a wɔwɔ Babel no nyinaa anom sɛ: AWURADE nyɛ wo sɛ Sedekia ne Ahab a Babel hene de ogya hyew wɔn no,

²³ esiane sɛ wɔadi nkwaseasɛm Israel, na wɔafofa wɔn mfɛfo yerenom, na wɔaka me din mu atosɛm a menhyɛɛ wɔn ɛ, na me na minim, na mene dansefo, AWURADE asɛm ni.

Ɔmena nhoma a efi atukɔfo no hɔ kɔma ɔsɔfo panyin Semaia

²⁴ Na ka kyerɛ Nehelamni Semaia sɛ:

²⁵ Sɛ asafo AWURADE, Israel Nyankopɔn se ni: Esiane sɛ wo ara wo din mu wode nhoma amena ɔman a wɔwɔ Yerusalem nyinaa ne Maaseia ba ɔsɔfo Sefania ne asɔfo no nyinaa sɛ:

²⁶ AWURADE ahyɛ wo sɔfo asi Yehoiada ananmu, sɛ monye ahwɛfo nhwɛ AWURADE fi ntia obiara a wabɔ dam na ɔhyɛ nkɔm, na woato no dua mu ne ɔdan mu nti,

²⁷ afei, ɛdɛn nti na woantwiw Anatotni Yeremia a ɔhyɛ mo nkɔm no anim?

²⁸ Efisɛ wasoma aba yɛn nkyɛn Babel sɛ: Ɛbɛkyɛ: Munsisi adan ntena mu na monyeyɛ nturo nni mu aba!

²⁹ Na ɔsɔfo Sefania kenkan nhoma yi odiyifo Yeremia asom.

³⁰ Na AWURADE asɛm baa Yeremia nkyɛn sɛ:

³¹ Soma kose atukɔfo no nyinaa sɛ: Sɛɛ na AWURADE ka Nehelamni Semaia ho: Esiane sɛ Semaia ahyɛ mo nkɔm, na mansoma no, na wama mode mo ho ato atoro so nti,

³² sɛ AWURADE se ni: Hwɛ, mereba mabɛtwe Nehelamni Semaia ne n’asefo aso, ɔrennya obi a ɔbɛtena ɔman yi mu a, obehu papa a merebɛyɛ me man no, AWURADE asɛm ni, efisɛ waka atuatew atia AWURADE.