Yeremia 28 - KYERƐW KRONKRON

Yeremia ne atoro diyifo Hanania

¹ Na afe no ara mu, Yuda hene Sedekia ahenni mfiase, afe a ɛto so anan no, sram a ɛto so anum so, Asur ba odiyifo Hanania a ofi Gibeon no ka kyerɛɛ me AWURADE fi, asɔfo ne ɔman no nyinaa anim sɛ:

² Sɛ asafo AWURADE, Israel Nyankopɔn, se ni: Mabubu Babel hene kɔndua no,

³ ɛha mfirihyia abien pɛ, mede AWURADE fi nneɛma a Babel hene Nebukadnesar bɛfa fii ha yi de kɔɔ Babel no nyinaa mɛsan aba ha yi.

⁴ Na Yuda hene Yekonia a ɔyɛ Yehoiakim ba ne Yuda atukɔfo a wɔkɔɔ Babel no nyinaa, mede wɔn mɛsan aba ha yi bio, AWURADE asɛm ni, na mebubu Babel hene kɔndua no.

⁵ Na odiyifo Yeremia ka kyerɛɛ odiyifo Hanania, asɔfo no ne ɔman a wogyinagyina AWURADE fi no nyinaa anim,

⁶ na odiyifo Yeremia kae sɛ: Saa? AWURADE mma ɛnyɛ sa! AWURADE mma wo nsɛm a worehyɛ nkɔm sɛ wɔde AWURADE fi nneɛma ne atukɔfo nyinaa befi Babel asan aba ɛha yi no mmra mu.

⁷ Nanso tie asɛm a mereka wo ne ɔman no nyinaa asom yi ɛ:

⁸ Adiyifo a wodii m’anim ne w’anim fi teteete no, wɔhyehyɛɛ nsaase bebree ne ahenni akɛse akodi ne bɔne ne owuyare ho nkɔm.

⁹ Odiyifo a ɔhyɛ asomdwoe ho nkɔm no, sɛ odiyifo no asɛm nya ba mu a, ɛno na wohu odiyifo a AWURADE somaa no nokwarem.

¹⁰ Ɛnna odiyifo Hanania yii kɔndua no fii odiyifo Yeremia kɔn so bubuu mu.

¹¹ Na Hanania kae ɔman no nyinaa anim sɛ: Sɛ AWURADE se ni: Saa ara na mebubu Babel hene Nebukadnesar kɔndua no afi amanaman nyinaa kɔn so, ɛha mfe abien pɛ! Na Yeremia siim kɔɔ ne kwan.

¹² Na odiyifo Hanania bubuu kɔndua no fii odiyifo Yeremia kɔn so no akyi no, AWURADE asɛm baa Yeremia nkyɛn sɛ:

¹³ Kɔ na kɔka kyerɛ Hanania sɛ: Sɛ AWURADE se ni: Dua kɔndua na woabubu mu, na yɛ dade kɔndua si ananmu.

¹⁴ Na sɛ asafo AWURADE, Israel Nyankopɔn, se ni: Dade kɔndua na mede mato amanaman yi nyinaa kɔn so, sɛ wɔnsom Babel hene Nebukadnesar; nso wɔbɛsom no, na mede wuram mmoa po mama no.

¹⁵ Na odiyifo Yeremia ka kyerɛɛ odiyifo Hanania sɛ: Hanania, tie ɛ, AWURADE nsomaa wo ɛ, na wo na woama ɔman yi de wɔn ho ato atoro so.

¹⁶ Ɛno nti, sɛ AWURADE se ni: Hwɛ, meretu wo mafi asase ani: Afe yi na wubewu, efisɛ woaka atuatew ahyɛ AWURADE.

¹⁷ Na odiyifo Hanania wui afe no ara mu ɔsram a ɛto so ason mu.