Yeremia 22 - KYERƐW KRONKRON

Wɔbɔ ahemfifo kɔkɔ, atemmu ho

¹ Sɛ AWURADE se ni: Sian kɔ Yuda hene fi, na kɔka asɛm yi hɔ sɛ:

² Tie AWURADE asɛm, Yuda hene a wote Dawid agua so no, wo ne wo nkoa ne wo man a wɔfa apon yi mu ba mu no.

³ Sɛ AWURADE se ni: Mummu atɛntrenee, nyɛ adetrenee, na munyi nea wɔafow no mfi omimfo nsam, na ɔhɔho, ayisaa ne okunafo, monnhyɛ wɔn so, mommmɔ wɔn atirimmɔden, na mogya a edi bem nso, munnhwie nngu ɛha yi.

⁴ Na sɛ mudi asɛm yi so ampa a, ɛnne ahene a ɛtete Dawid agua so bɛtena nteaseɛnam mu ne apɔnkɔ so abɛfa ofi yi apon akɛse mu aba mu, ɔno ne ne nkoa ne ne man.

⁵ Na sɛ moantie nsɛm yi a, ɛnne maka me ho ntam, AWURADE asɛm ni, sɛ ofi yi bɛdan ofituw.

⁶ Na sɛ AWURADE ka Yuda hene fi ho ni: Anka mote sɛ Gilead ma me, ne Lebanon nkoko atifi, nanso mɛdan wo anwea pradada so, ne nkurow a wɔnte mu!

⁷ Na mereyi asɛefo mahyɛ wo, wɔn akode kurakura wɔn, na wɔatotow wo nkyeneduru a wɔapaw no de agugu ogya mu.

⁸ Na amanaman pii betwam kurow yi ho, na wɔasise wɔn ho wɔn ho sɛ: Efi dɛn so na AWURADE ayɛ kurow kɛse yi sɛɛ?

⁹ Na wɔbɛka sɛ: Efisɛ wɔagyaw AWURADE wɔn Nyankopɔn apam, na wɔakɔsɔre anyame foforo asom wɔn.

¹⁰ Munnsu owufo na munnnyam no. Osu mmom na munsu nea ɔrekɔ no, na ɔrensan mma bio mmehu n’awo asase.

Yosia mma ho atemmusɛm

¹¹ Na sɛ AWURADE ka Salum a ɔyɛ Yuda hene, Yosia ba a odi hene si n’agya Yosia ananmu a ofi ha kɔe no ho ni: Ɔrensan mma ha bio,

¹² na nea wɔatu no kɔ no, ɛhɔ na obewu, na ɔrenhu asase yi bio.

¹³ Nea ɔfa ɔkwan a ɛnteɛ so kyekye ne fi na ɔde nsisi si n’abansoro na ɔma ne yɔnko yɛ adwuma kwa, na ɔmfa n’akatua mma no no nnue!

¹⁴ Nea ɔka sɛ: Mesi dan a emu da hɔ ayeyɛ mu abansoro adan, a ɛsosoe pii mafa, na otwitwa mu mfɛnsere, na ɔde nkyeneduru sɛm mu, na ɔde adukɔkɔɔ sra mu!

¹⁵ W’ani abere kyeneduru ho yi nti, so wubedi hene nen? So w’agya annidi annom ammu atɛntrenee anyɛ adetrenee? Ɛno nti nso na esii no yiye.

¹⁶ Odii ɔbrɛfo ne ohiani asɛm maa wɔn, enti na esii no yiye. So ɛnyɛ eyi ne me ho nimdeɛ? AWURADE asɛm ni.

¹⁷ Nanso w’aniwa ne wo koma nni hwee so sɛ wo mfaso so, ne mogya a edi bem so sɛ engu fam, ne amim ne nhyɛso so sɛ wobɛyɛ.

¹⁸ Ɛno nti sɛ AWURADE ka Yuda hene Yehoiakim a ɔyɛ Yosia ba no ho ni: Wɔrennyam no sɛ: Due, me nuabanin! Ne: Due, onuabea! Wɔrennyam no sɛ: Due, owura! Ne: Due, onuonyamfo!

¹⁹ Afurum sie na wɔde besie no, wɔbɛtwe no atow no akyene Yerusalem apon akyi.

²⁰ Foro kɔ Lebanon kosu, na ma wo nne so Basan, na teɛm fi Abarim, efisɛ wɔadwerɛw w’adɔfo nyinaa.

²¹ Wudii yiye no, mekasa mekyerɛɛ wo, na wuse: Merentie. Saa ne wo kwan fi wo mmabunbere, sɛ wuntie me nne.

²² Mframa bɛyɛn w’ayɛnfo nyinaa, na w’adɔfo bɛkɔ nnommumfa mu; ɛno ansa na w’ani bewu na w’anim agu ase, wo bɔne nyinaa ho.

²³ Wo a wote Lebanon na woayɛ wo berebuw nkyeneduru so no, sɛ ɛyaw ne awoko, sɛ ɔbaa wofo de ba wo so a, anka wobesi apini dɛn?

Konia ho atemmusɛm

²⁴ Sɛ mete ase yi, AWURADE asɛm ni, sɛ Yuda hene Konia a ɔyɛ Yehoiakim ba no yɛ me nifa so nsɔanokaa po a, anka mɛtew no mafi hɔ.

²⁵ Na mede wo mɛhyɛ wɔn a wɔhwehwɛ wo kra no nsa, ne wɔn a wusuro wɔn anim no nsa, ne Babel hene Nebukadnesar ne Kaldeafo nsa;

²⁶ na mɛpra wo ne wo na, a ɔwoo wo no makɔ asase bi a ɛnyɛ hɔ na wɔwoo mo so, na ɛhɔ ara na mubewuwu,

²⁷ na asase a wɔn kra pɛ sɛ wɔbɛsan aba so no, wɔrensan mma hɔ bio.

²⁸ So ɔbarima Konia yi ayɛ sɛ annwene a abɔ na wommu, anaa ade bi a obiara ani nnye ho? Ɛdɛn nti na wɔtow no ne n’asefo gu asase a wonnim so yi?

²⁹ Asase, asase, asase, tie AWURADE asɛm!

³⁰ Sɛ AWURADE se ni: Monkyerɛw ɔbarima yi ho sɛ ɔyɛ nea onni mma, ɔbarima a ɔrenni yiye ne nna nyinaa, na n’asefo mu biara a ɔbɛtena Dawid ahengua so na wadi Yuda so bio no renni yiye.