Sefania 1 - KYERƐW KRONKRON

Abufuw da no

¹ Awurade asɛm a ɛbaa Sefania a ɔyɛ Kusi ba Gedalia ba Amaria ba Hesekia ba nkyɛn, Yuda hene Yosia a ɔyɛ Amon ba bere so ni.

² Ɔpra na mɛpra ade nyinaa afi asase ani makɔ, Awurade asɛm ni.

³ Mɛpra onipa ne aboa akɔ, mɛpra wim nnomaa ne ɛpo mu mpataa akɔ, ne hintidua ɛne abɔnefo, na matwitwa nnipa afi asase ani agu, Awurade asɛm ni.

⁴ Na mɛteɛ me nsa, Yuda so ne Yerusalemfo nyinaa so, na metwa Baal nkae ne abosom asɔfo no din afi ha yi agu,

⁵ ne wɔn a wɔsɔre ɔsoro asafo, adan atifi, ne asɔrefo a wɔkeka Awurade ntam na wɔkeka wɔn hene ntam,

⁶ ne wɔn a wɔsan fi Awurade akyi, ne wɔn a wɔnhwehwɛɛ Awurade na wommisaa n’akyi kwan no.

⁷ Monyɛ komm, Awurade Nyankopɔn anim, na Awurade da no abɛn, na Awurade asiesie okum afɔre, wadwira wɔn a wafrɛ wɔn no.

⁸ Na Awurade kum afɔre da no, mɛtwe mmapɔmma ne ahenemma no ne wɔn a wɔhyɛ ananafo atade nyinaa aso.

⁹ Na ɛda no mɛtwe obiara a ohuruw tra apongua ase aso, wɔn a wɔde ɔhyɛ ne nsisi hyehyɛ wɔn wuranom afi amaama.

¹⁰ Na ɛda no, Awurade asɛm ni, osu nne befi Mpataa Pon no ano, na adwotwa afi ɔfa a ɛto so abien no mu, na ɔsɛe kɛse afi nkoko no so aba.

¹¹ Muntwa adwo, mo a mote Mortar, efisɛ wɔasɛe aguadifo asafo no nyinaa, na wɔatwitwa wɔn a wɔsoa dwetɛ no nyinaa.

¹² Na ɛbere no mu, mede akanea mɛpɛɛpɛe Yerusalem mu, na matwe nnipa a wɔada wɔn puw so no aso, wɔn a wose wɔn komam sɛ: Awurade renyɛ papa na ɔrenyɛ bɔne no.

¹³ Na wɔn ahonyade bɛdan afow ade, na wɔn afi adeda ntuw; wobesisi adan, na wɔrentena mu, na wɔbɛyɛ bobe nturo, na wɔrennom mu nsa.

¹⁴ Awurade da kɛse no abɛn, abɛn na ɛreba ntɛm sɛ, Awurade da no nne yɛ nwene sɛ! Ɔdɔmmarima teɛm dennen wɔ hɔ.

¹⁵ Ɛda no yɛ anibere da, ahohia ne ahokyere da, ɔsɛe ne amamfoyɛ da, esum ne kusuuyɛ da, amununkum ne kusukuukuu da,

¹⁶ torobɛnto ne osebɔ da a ɛreba afasu mu nkurow ne aban atenten ano sorɔnsorɔn so.

¹⁷ Na mehiahia nnipa ho na wɔanantew sɛ anifuraefo, efisɛ Awurade na wɔayɛ no bɔne; na wɔn mogya begu sɛ mfutuma, ne wɔn honam sɛ nwura dodow;

¹⁸ wɔn dwetɛ anaa wɔn sika rentumi nnye wɔn, Awurade abufuw da no, na ne ninkuntwe gya no mu na asase no nyinaa bɛhyew, na ɔdwerɛw a ɛba mpofirim ara na ɔde bɛba asase no sofo nyinaa so.