Rut Nwoma 3 - KYERƐW KRONKRON

Rut ne Boas

¹ Na n’ase Naomi ka kyerɛɛ no sɛ: Me ba, mennhwehwɛ ahomee memma wo na asi wo yiye anaa?

² Hwɛ, yɛn manni, Boas a wo ne ne mmaawa nantewee no wɔ hɔ; ɔrehuw atoko so anadwo yi wɔ awiporowbea.

³ Na guare na sra hyɛ wo ntade na sian kɔ aporowee hɔ; na nyi wo ho adi nkyerɛ ɔbarima no kosi sɛ obewie adidi ne ɔnom ansa;

⁴ na sɛ ɔkɔda na wukohu ne dabere hɔ a, kɔ koyi n’anafo ntama na da hɔ; na ɔno ara bɛkyerɛ wo nea yɛ.

⁵ Na obuaa no sɛ: Mɛyɛ nea woka nyinaa.

⁶ Na osian kɔɔ aporowee hɔ kɔyɛe sɛnea n’ase hyɛɛ no nyinaa.

⁷ Na Boas didi nomee na ne bo tɔɔ ne yam no, ɔkɔ kɔdaa atokokuw no ano hɔ. Na ɔbae komm beyii n’anafo ntama na ɔdaa hɔ.

⁸ Na ɔdasum no, ɔbarima no bɔɔ birim, na ɔmaa ne mu so hwɛe, na hwɛ, ɔbea da n’anafo.

⁹ Na ɔkae sɛ: Ɛyɛ wo hena? Na ose: Ɛyɛ me, w’abaawa Rut. Trɛw w’atade mmuano mu fa kata w’abaawa so, na abusua mu gyefo ne wo.

¹⁰ Na ɔkae sɛ: AWURADE nhyira wo, me ba, woama w’akyiri adɔe ayɛ yiye sen kan de no, sɛ woanni mmerante, ahiafo oo, adefo oo, akyi.

¹¹ Na afei, me ba, nsuro. Nea woka nyinaa, mɛyɛ mama wo, efisɛ me manfo a wɔfa kurow pon ano nyinaa nim sɛ woyɛ ɔbea pa.

¹² Na afei, ɛwom sɛ abusua mu gyefo ne me, nanso abusua mu gyefo bi wɔ hɔ a ɔbɛn sen me.

¹³ Tena ha anadwo yi, na sɛ anɔpa, ɔyɛ wo ogyefo ade a, eye, ma ɔnyɛ ogyefo: Na sɛ ɔmpɛ sɛ ɔyɛ wo ogyefo ade a, ɛnne, sɛ AWURADE te ase yi, me na mɛyɛ wo ogyefo. Da ma ade nkye.

¹⁴ Na ɔdaa n’anafo hɔ koduu anɔpa. Na ɔsɔree ansa na obi rehu ne yɔnko. Na ɔkae sɛ: Wɔmmma wɔnnte sɛ ɔbea no baa aporowee ha.

¹⁵ Na ɔka kyerɛɛ no sɛ: Fa mmuatama a egugu wo so no bra, na so mu. Na osoo mu, na osusuw atoko susukora asia guu mu, na ɔde soaa no, na ɔkɔɔ kurow no mu.

¹⁶ Na oduu n’ase nkyɛn no, obisaa sɛ: Ɛte dɛn, me ba? Na ɔkaa nea ɔbarima no yɛɛ no nyinaa kyerɛɛ no.

¹⁷ Na ɔkae sɛ: Atoko susukora asia yi na ɔmaa me, na ose, mfa nsansa nkɔ w’ase nkyɛn.

¹⁸ Na Naomi kae sɛ: Tena hɔ, me ba, kosi sɛ wubehu sɛnea asɛm yi besi, efisɛ ɔbarima no renhome gye sɛ owie asɛm yi di nnɛ ansa.