Rut Nwoma 1 - KYERƐW KRONKRON

Elimelek tutu kɔtena Moab

¹ Akannifo no bere so no, ɔkɔm baa Yuda asase so. Na ɔbarima bi a ofi Betlehem a ɛwɔ Yuda kɔe sɛ ɔkɔtena Moab asase so ayɛ hɔ hɔho, ɔno ne ne yere ne ne mmammarima baanu.

² Ɔbarima no din de Elimelek, na ne yere din de Naomi, na ne mmammarima baanu no din de Mahlon ne Kilion, wɔyɛ Efratifo a wofi Betlehem a ɛwɔ Yuda. Na woduu Moab asase so, na wɔtenaa hɔ.

³ Na Elimelek, Naomi ne kunu no wui, na ɛkaa ɔno ne ne mma baanu no.

⁴ Na wɔwaree yerenom Moabfo mu, obiako din de Orpa, na obiako no din de Rut. Na wɔtenaa hɔ bɛyɛ sɛ mfe du.

⁵ Na wɔn baanu no: Mahlon ne Kilion, nso wuwui, na ɛkaa ɔbea no (Naomi) nko ne mma baanu no ne kunu no wu akyi.

Naomi ne ne sew san kɔ Betlehem

⁶ Ɛnna ɔsɔree, ɔne ne nsenom baanu no, sɛ ɔresan afi Moab asase so aba, efisɛ ɔtee wɔ hɔ sɛ: AWURADE abɛhwɛ ne man na wama wɔn aduan.

⁷ Na ofii nea ɔwɔ hɔ, na ne nsewnom baanu no ka ne ho. Na wosii kwan so sɛ wɔresan aba Yuda asase so.

⁸ Na Naomi ka kyerɛɛ ne nsewnom baanu no sɛ: Monsan nkɔ mo nanom fi. AWURADE ne mo nni no yiye sɛnea mo ne awufo no ne me adi no yi.

⁹ AWURADE mma munnya atenaye mo kununom fi. Na ofifew wɔn ano; na wɔmomaa wɔn nne so susui.

¹⁰ Na wɔka kyerɛɛ no sɛ: Dabi, yɛne wo bɛsan akɔ wo manfo nkyɛn.

¹¹ Na Naomi kae sɛ: Me mma, monsan! Ɛdɛn na mo ne me bɛkɔ? So mmammarima da so wɔ me yam na wɔabɛyɛ mo kununom?

¹² Me mma, monsan nkɔ! Na manyin dodo sɛ menya okunu. Sɛ mise: Mewɔ anidaso, na minya okunu anadwo yi na mewo mmammarima po a,

¹³ so ɛno nti mobɛtwɛn wɔn akosi sɛ wobenyin anaa? So ɛno nti mobɛtena hɔ a morenware anaa? Dabi, me mma, na ɛyɛ me awerɛhow dodo mo nti, efisɛ AWURADE ne me anni no yiye.

¹⁴ Na wɔmomaa wɔn nne so susui bio. Na Orpa few ne sew no ano de kraa no; na Rut de, ɔbataa ne ho.

¹⁵ Na Naomi kae sɛ: Hwɛ, wo kora asan kɔ ne manfo ne n’anyame nkyɛn. San di wo kora akyi!

¹⁶ Na Rut kae sɛ: Nhyɛ me sɛ minnyaw wo mensan mimfi w’akyi; na nea wokɔ na mɛkɔ, na nea wosoɛ na mɛsoɛ; wo man bɛyɛ me man, na wo Nyankopɔn ayɛ me Nyankopɔn;

¹⁷ nea wubewu, na mewu, na ɛhɔ ara na wobesie me; AWURADE nyɛ me eyi ne bi nka ho, sɛ gye owu na ɛbɛtetew me ne wo ntam.

¹⁸ Na Naomi hui sɛ wawe ahina so sɛ ɔne no bɛkɔ no, ɔne no gyaee kasa wɔ ho.

¹⁹ Na wɔn baanu no nantew beduu Betlehem. Na woduu hɔ no, wɔn nti kurow no nyinaa bɔɔ twi na wɔkae sɛ: So Naomi ni?

²⁰ Na ɔka kyerɛɛ wɔn sɛ: Mommfrɛ me Naomi, na momfrɛ me Mara, efisɛ Tweaduampɔn ne me adi no bɔnwoma so sɛ!

²¹ Mekɔɔ no ma, na AWURADE de me hunu na aba; ɛdɛn na mofrɛ me Naomi, bere ko a AWURADE ayi me ntɛn, na Tweaduampɔn ne me adi no bɔne yi?

²² Sɛ Naomi ne n’ase Moabni Rut san fii Moab asase so bae ni. Na woduu Betlehem no, na wɔafi atokotwa ase.