Ɔsɛnkafo 10 - KYERƐW KRONKRON

Nyansa ho mmɛ horow

¹ Nwansena funu ma odufrafo aduru bɔn na ɛporɔw, na nkwaseasɛm kakra yɛ duru sen nyansa ne anuonyam.

² Onyansafo koma wɔ ne nifa mu, na ɔkwasea koma wɔ ne benkum mu.

³ Nanso ɔkwan biara a ɔkwasea fa so no, ntease bɔ no, na ɔka kyerɛ nnipa nyinaa sɛ ɔyɛ ɔkwasea.

⁴ Sɛ otumfo honhom sɔre hyɛ wo a, nnyaw w’afa, na odwo brɛ bɔne akɛse ase.

⁵ Adebɔne bi wɔ hɔ a mihui owia ase sɛ mfomso bi a efi otumfo anim,

⁶ wɔama nkwasea so bebree, na adefo tete fam.

⁷ Mahu nkoa a wɔtete apɔnkɔ so ne adehye a wɔnenam fam sɛ nkoa.

⁸ Nea otu amoa no, emu na ɔbɛhwe, na nea oburuw ban no, ɔwɔ bɛka no.

⁹ Nea otu abo no, nya mu yaw, na nea ɔpae nnua no, emu na obepira

¹⁰ Sɛ obi dade ano akum na wansew ano a, ɛnne gye sɛ ɔma ahoɔden dɔɔso, nanso nyansa ma odi no yiye.

¹¹ Sɛ ɔwɔ ka ansa na wɔkyere no kaberɛ a, mfaso bi nni hɔ mma kaberɛkyerefo no.

¹² Onyansafo anom asɛm yɛ nyam, na ɔkwasea ano bɛmene no.

¹³ N’anom asɛm mfiase yɛ nkwaseasɛm, na ne kasa awiei yɛ adammɔ bɔne.

¹⁴ Ɔkwasea ma nsɛm dɔɔso, nso onipa nnim nea ɛreba, na nea ɛbɛba n’akyi no, hena na ɔbɛkyerɛ no?

¹⁵ Nkwasea haw hyɛ nea onnim kurow mu kɔ brɛ.

¹⁶ Due, wo asase a wo hene yɛ abofra, na wo mmapɔmma to pon anɔpa.

¹⁷ Nhyira ne wo, asase a wo hene yɛ adehye ba, na wo mmapɔmma to pon bere a ɛsɛ mu, ahoɔden nti, na ɛnyɛ asabow nti.

¹⁸ Akwadworɔ nti na mpuran hunhuan, na anihaw ma ɔdan nwini.

¹⁹ Ɔserew nti na wosiesie aduan, na nsa ma ateasefo ani gye, na sika na ɛyɛ ne nyinaa.

²⁰ Mpo w’adwene mu no, nnome ɔhene, anaa ɔdefo wɔ wo pia mu, na wim nnomaa de nne no bɛkɔ, na ntakraboa aka asɛm no.