Nnwom mu dwom 6 - KYERƐW KRONKRON

Nhyia mu anigye

¹ Mmea mu hoɔfɛfo, ɛhe na wo dɔfo kɔ? Ɛhe na wo dɔfo no adan ne ho afa? Na yɛne wo nkɔhwehwɛ no.

² Me dɔfo asian kɔ ne turo mu, aduhuam akofi ho, sɛ okodidi nturo no mu, na watetew sukooko nhwiren afɛfɛ no.

³ Me de, mewɔ me dɔfo, na me dɔfo wɔ me, ɔno a ɔyɛn ne nguan sukooko no mu.

⁴ M’adamfowaa, wo ho yɛ fɛ sɛ Tirsa, woyɛ oyima sɛ Yerusalem, wo ho yɛ hu sɛ wɔn a wɔahyia ɔfrankaa ase.

⁵ Yi w’ani fi me so, na ɛhaw me, wo nwi te sɛ mmirekyi kuw a wobutubutuw Gilead bepɔw ho.

⁶ Wo se te sɛ nguanten mmaatan a wofi aguaree reforo ba a wɔn nyinaa awowo ntanta, na nea wabu kyenenee nni wɔn mu.

⁷ W’asontɔre mu te sɛ atea aba fa, w’anim ntontan mu.

⁸ Ahemmaa si aduɔsɔn, na ayefam si aduɔwɔtwe, na mmabaa nni ano.

⁹ Obiako ne m’aborɔnoma a odi mu, ne na ba koro ne no, nea ɔwoo no ɔdɔba ne no, mmabaa hu no, na wohyira no, ahemmaa ne ayefam nso, na wɔkamfo no.

¹⁰ Ɛhena ne oyi a opue sɛ adekyee, ne ho yɛ fɛ sɛ ɔsram, ne ho tew sɛ owia, na ne ho yɛ hu sɛ asraafo a wokura ɔfrankaa yi?

¹¹ Misian mekɔɔ adwe turo mu, sɛ mekɔhwɛ obon mu nhabamma frɔmfrɔm, sɛ mekɔhwɛ sɛ obobe afefɛw, sɛ atea agu nhwiren anaa?

¹² Minnim sɛ me kra de me besi me man adehye nteaseɛnam mu.

¹³ San, san bra, Sulamit, san, san bra, na yɛnhwɛ wo. Dɛn na mohwɛ wɔ Sulamit ho? Ɔte sɛ Mahanaim asaw no.