Nnwom mu dwom 5 - KYERƐW KRONKRON

Ayeforo no nnae

¹ Maba me turo mu, me nua, ayeforo, meretetew me kurobow ne m’aduhuam, meredi me wokyɛm ne me wo, merenom me nsa ne me nufusu. Nnamfonom, munnidi, adɔfonom, monnom na mommee.

² Me de, mereda no, na me koma nyanee. Me dɔfo nne ni, ɔpem se: Hiɛ me, me nua, m’adamfowaa, m’aborɔnoma a wudi mu; na obosu ayɛ m’atifi ma, anadwo nsosɔe ayɛ me mpɛsɛmpɛsɛ ma.

³ Mayi m’atade, mɛyɛ dɛn mahyɛ? Mahohoro me nan ho, mɛyɛ dɛn mayɛ no fi?

⁴ Me dɔfo teɛɛ ne nsa faa mfɛnsere mu, na me yam hyehyee me ne ho.

⁵ Ɛnna meresɔre sɛ mikohiɛ me dɔfo no, kurobow sosɔɔ me nsa ho, na kurobow sosɔɔ me nsa so, apratwom nsomu so.

⁶ Merehiɛ me dɔfo, na me dɔfo dan ne ho sen kɔe; ɔrekasa no, me koma tui; mehwehwɛɛ no, na manhu no, mefrɛɛ no, na wannye me so.

⁷ Awɛmfo a wokyin kurow mu no bɛtoo me, wɔbobɔɔ me, wopiraa me, afasu so awɛmfo gyee me nkataanim.

Ayeforokunu no ahoɔfɛ

⁸ Meka mo ntam, Yerusalem mmabea, sɛ muhu me dɔfo a, monka nkyerɛ no sɛ meyare ɔdɔ.

⁹ Dɛn na wo dɔfo de sen ɔdɔfo bi, mmea mu ɔhoɔfɛfo? Dɛn na wo dɔfo de sen ɔdɔfo bi, sɛ woka ntam gu yɛn so sɛɛ yi?

¹⁰ Me dɔfo hoa na ɔbere, ɔdɛnsow nnipa mpem mpem mu.

¹¹ Ne ti yɛ sika amapa pa, ne mpɛsɛmpɛsɛ yɛ kuhaa, ebiri sɛ anene.

¹² N’aniwa te sɛ asuten ho mmorɔnoma a woguare nufusu, sisi ne mayɛ so.

¹³ N’afono te sɛ aduhuam akofi a nnuhuam yɛ so yiye; n’anofafa te sɛ sukooko fɛfɛ a ɛsosɔ kurobow;

¹⁴ ne nsa yɛ sika nnwinne a wɔde sikabereɛbo asisi mu; ne nipadua yɛ asonse dwinne a wɔde hoabo adura so.

¹⁵ N’asrɛ yɛ abofufu adum a esisi amapa nnyinaso so, ne suban te sɛ Lebanon, wɔapaw no sɛ kyeneduru nnua.

¹⁶ N’anom wɔ adɔkɔdɔkɔde, na ne ho nyinaa yɛ anisɔde ara nko. Me dɔfo ni, na m’adamfo ni, Yerusalem mmabea.