Nnwom mu dwom 4 - KYERƐW KRONKRON

Adamfowaa no ahoɔfɛ

¹ Hwɛ, wo ho yɛ fɛ, m’adamfowaa, hwɛ, wo ho yɛ fɛ, na w’aniwa yɛ aborɔnoma aniwa, w’anim ntontan mu. Wo nwi te sɛ mmirekyikuw a wobutubutuw Gilead bepɔw ho.

² Wo se te sɛ nguankuw a wɔatwitwa wɔn nwi a wofi aguaree a wɔn nyinaa awowo ntanta, na nea wabu kyenenee nni wɔn mu;

³ w’anofafa te sɛ koogyan hama, na w’anom kasa yɛ dɛ; w’asontɔre mu te sɛ atea aba fa, w’anim ntontan mu;

⁴ wo kɔn si so teateaa sɛ Dawid abantenten a akyɛm nketenkete apem sensɛn ho, ne nyinaa yɛ nnɔmmarima akyɛm;

⁵ wo nufu abien te sɛ atweforo nta a wodidi sukooko mu.

⁶ Mɛkɔ kurobow bepɔw ne ohuamfufu koko no so akosi sɛ onwini bedwo, na sunsuma bɛyera.

⁷ Wo ho nyinaa yɛ fɛ, m’adamfowaa, na ɛdɛm biara nni wo ho.

⁸ Ayeforo, wo ne me mfi Lebanon, wo ne me mfi Lebanon nkɔ, na yemfi Amena atifi, Senir ne Hermon atifi, agyata tenabea, asebɔ mmepɔw so, nhwɛ fam.

⁹ Woafa me koma, me nua, ayeforo, wode w’aniwa mu biako afa me koma, ne wo kɔn mu ntweaban biako.

¹⁰ Wo dɔ yɛ fɛ dɛn ara, me nua, ayeforo, wo dɔ yɛ dɛ sen nsa dɛn ara, na wo sradehuam hua sen nnuhuam nyinaa.

¹¹ W’ano sosɔ ɛwomono, ayeforo, ɛwo ne nufusu wɔ wo tɛkrɛma ase, na wo ntade mu hua te sɛ Lebanon hua.

¹² Me nua, m’ayeforo yɛ turo a woato ano pon mu, nsuaniwa a wɔasiw ano kwan, ne asubura a wɔasɔw ano.

¹³ W’abaa yɛ atea aba ne nnuaba a ɛwɔ bo turo, ahuahaa ne nnuannua horow,

¹⁴ nnuannua ne nkuto, osiko ne pɛprɛ ne ohuamfufu nnua nyinaa, kurobow ne dupapo ne nnuhuam atitiriw nyinaa;

¹⁵ nturo mu asubura, mmasu aniwa ne nsuwansuwa a efi Lebanon so sen.

¹⁶ Benkum fam mframa, sɔre, na nifa mframa nso, bra bɛbɔ me turo mu, ma ne nnuhuam nsosɔ. Ma me dɔfo mmra ne turo mu, na onni mu nnuaba a ɛwɔ bo no.