Nnwom mu dwom 2 - KYERƐW KRONKRON

Adamfowaa ho anigyina

¹ Me de, meyɛ Saron nhwiren, ne abon mu sukooko.

² M’adamfowaa wɔ mmabea mu sɛ nsɔe ntam sukooko.

³ Me dɔfo wɔ mmabanin ntam sɛ akutu a ɛwɔ kwae mu nnua ntam, ne nwini mu na mepɛ matena, na n’aba yɛ me dodom dɛ.

⁴ Ɔde me aba apontow dan mu, na ne frankaa a edi me so ne ɔdɔ.

⁵ Momfa bobe aba tetare nwowaw me, momfa akutu aba nnwudwo me, efisɛ meyare ɔdɔ.

⁶ Ao sɛ anka ne nsa benkum hyɛ me ti ase, na ne nifa yɛ me atuu.

⁷ Meka mo ntam, Yerusalem mmabea, atwewa ne petee mu aforotebere ho ntam, sɛ munnnyan na monnhwanyan ɔdɔ kosi sɛ ɔno ara pɛ.

⁸ Me dɔfo nne ni! Hwɛ, ɔreba ni! Ohuruw tratra mmepɔw, ɔbɔ nkoko so pentenkwaw.

⁹ Me dɔfo te sɛ ɔtwe anaa ɔforoteforo. Hwɛ sɛ ogyina yɛn fasu akyi, ɔhwɛ mfɛnsere mu, otwam nyinam ahunaniankansa mu.

¹⁰ Me dɔfo kasa se me sɛ: Sɔre ɛ, m’adamfowaa, me yima, na bra ɛ!

¹¹ Na hwɛ, awɔwbere atwam, asusow agyae na ɛkɔ koraa.

¹² Nhwiren yi ne ho adi asase so, dwonto bere adu, na wɔte aturukuku nka, yɛn asase so.

¹³ Borɔdɔma rema n’abunabun agyigye, na obobe nnwennaa reyi ne hua. Sɔre, m’adamfowaa, me yima, na bra ɛ!

¹⁴ M’aturukuku a wowɔ ɔbotan tokuru mu ne sorɔnsorɔmmea ahintawee, ma minhu w’anim, ma mente wo nne, na wo nne yɛ dɛ, na w’anim yɛ fɛ.

¹⁵ Monkyere sakraman mma yɛn, sakraman nketewa a wɔsɛe bobe nturo no, na yɛn bobe asosow nnwennaa.

¹⁶ Me dɔfo wɔ me, na me nso mewɔ no, ɔno a ɔyɛn ne nguan sukooko mu.

¹⁷ Dan wo ho, me dɔfo, na yɛ sɛ ɔtwe anaa ɔforoteforo, mpaapaemu mmepɔw so, kosi sɛ onwini bedwo na sunsuma ayerayera.