Nnwom 93 - KYERƐW KRONKRON

Daa hene

¹ AWURADE di hene, ɔde anuonyam ahyehyɛ ne ho. AWURADE ahyehyɛ ne ho, ɔde ahoɔden akyekyere ne ho, na wiase tim hɔ a ɛrenhim.

² W’agua tim hɔ fi tete, wowɔ hɔ fi daa.

³ Asuten ama so, AWURADE, asuten ama wɔn nne so, asuten ma wɔn huuyɛ so.

⁴ Nea ɔsen nsukɛse nne, nsu a ɛwɔ tumi, po mu asorɔkye nne, ɔne ɔsoro hɔ tumfo AWURADE

⁵ W’adansesɛm yɛ nokware pii; kronkronyɛ na ɛfata wo fi, AWURADE, nnasanten nyinaa.