Nnwom 90 - KYERƐW KRONKRON

NHOMA A ƐTO SO ANAN ( Nnwom 90—106 ) Daa Nyankopɔn ne yɛn guankɔbea

Onyankopɔn nipa Mose mpaebɔ

¹ Awurade, wo na woayɛ yɛn guankɔbea, awo ntoatoaso nyinaa mu.

² Wo de, wonnya nwoo mmepɔw na wunnya nyii asase ne wiase adi no, na wufi tete akyirikyiri kosi daakye akyirikyiri yɛ Onyankopɔn.

³ Woma ɔdesani dan mfutuma, na wuse: Onipa mma, monsan mmra mo dɔte mu.

⁴ Na mfirihyia apem yɛ w’ani so sɛ nnɛra da a etwaa mu ne anadwo mu dasu.

⁵ Woma wɔsen kɔ sɛ sunsuansu, wɔte sɛ adaeso, anɔpa wɔfefɛw sɛ wura,

⁶ anɔpa ɛyɛ frɔmfrɔm na ɛfefɛw, anwummere wotwa, na atwintwam.

⁷ Na yɛresa w’abufuw mu, na yɛahyew w’abufuhyew no ano.

⁸ Wode yɛn amumɔyɛ asi w’anim, wode yɛn kokoam bɔne aba w’anim hann no mu.

⁹ Na yɛn nna nyinaa twam kɔ w’abufuw mu, yɛhwere yɛn mfe sɛ asutu bi.

¹⁰ Yɛn mfirihyiam nna, emu wɔ mfe aduɔsɔn, na sɛ ɛboro so a, na ɛredu aduɔwɔtwe, na emu ahohoahoade yɛ ɔbrɛ ne ahuhude, na etwam ntɛm so, na yetu kɔ.

¹¹ Hena na ohu w’abufuw ano den a ɛyɛ, ne w’anibere, sɛ wo ho suro te?

¹² Ma yenhu yɛn nna kan sɛ ɛte, na yɛanya nyansa koma.

¹³ AWURADE, san w’akyi, ɛno, da bɛn ara? Na ma wo nkoa ade nyɛ wo mmɔbɔ.

¹⁴ Fa w’adɔe ma yɛmmee nhema, na yɛadi ahurusi, na yɛn ani agye yɛn nna nyinaa mu.

¹⁵ Ma yɛn ho nsan yɛn, sɛ nna a wobrɛɛ yɛn ase wɔ mu ne mfe a yehuu mu bɔne no.

¹⁶ Ma w’adwuma nna adi mma wo nkoa, na w’anuonyam nna adi wɔn mma so.

¹⁷ Na Awurade yɛn Nyankopɔn animtew mmra yɛn so, na yɛn nsa ano adwuma no, ma ɛnyɛ yiye mma yɛn, yiw, yɛn nsa ano adwuma na ma ɛnyɛ yiye.