Nnwom 89 - KYERƐW KRONKRON

Mpae a wɔbɔ ma Dawid fi

Esrani Etan nnwenho dwom

¹ Mɛto AWURADE adɔe ho dwom daa, mede m’ano mɛka wo nokwaredi makyerɛ awo ntoatoaso a edidi so;

² na mɛka sɛ: Adɔe besi so daa, ɔsoro hɔ na wode wo nokwaredi atim.

³ Me ne nea mayi no no apam apam bi, maka ntam makyerɛ m’akoa Dawid:

⁴ Mɛma w’asefo atim akosi daa, na mama w’ahengua asi so akodu awo ntoatoaso a edidi so so. Sela

⁵ Na ɔsoro yi wo, AWURADE, anwonwade ayɛ, ne wo nokware nso wɔ akronkronfo asafo mu.

⁶ Na hena na ɔwɔ wim a wɔde no bɛto AWURADE ho, hena na ɔsɛ AWURADE, anyame mma mu?

⁷ Onyankopɔn a ne ho yɛ hu, kronkronfo guabɔ kɛse no mu, na wosuro no sen wɔn a wɔatwa ne ho asi nyinaa.

⁸ AWURADE, asafo Nyankopɔn, hena na ɔte sɛ wo? Otumfo AWURADE, wo nokwaredi atwa wo ho ahyia.

⁹ Wo na wudi po mpatabiribiriyɛ so, sɛ n’asorɔkye sɔre a, wo na wudwudwo ano.

¹⁰ Wo na woabubu Rahab pasaa sɛ ɔtɔfo, wode wo tumi nsa abɔ w’atamfo apansam.

¹¹ Ɔsoro wɔ wo, asase nso wɔ wo; wiase ne ne mayɛ, wo na wohyɛɛ ase.

¹² Atifi fam ne Anafo fam, wo ara na wobɔe, Tabor ne Hermon di wo din mu ahurusi.

¹³ Tumi basa wɔ wo, wo nsa yɛ den, wɔama wo nifa so.

¹⁴ Trenee ne atemmu ne w’ahengua nnyinaso, adɔe ne nokware gyina w’anim.

¹⁵ Nhyira ne ɔman a wonim osebɔ, na wɔnantew wo, AWURADE, anim hann mu.

¹⁶ Wo din mu na wɔn ho bɛsɛpɛw wɔn daa nyinaa, na wo trenee mu na wɔama wɔn so.

¹⁷ Na wɔn ahoɔden ahyehyɛde ne wo, na wo dom mu na wɔama yɛn abɛn so.

¹⁸ Na AWURADE na yɛn kyɛm wɔ no, na Israel kronkronni no na yɛn hene wɔ no.

¹⁹ Da bi wokasae anisoadehu mu kyerɛɛ w’ahotefo sɛ: Madi maboa ɔbarima bi, mama obi a wɔapaw no fi ɔman no mu so.

²⁰ Mahu m’akoa Dawid, mede me ngo kronkron masra no.

²¹ Ɔno na me nsa bɛma watim, na me basa nso ahyɛ no den.

²² Ɔtamfo bi rensisi no, na obusuyɛfo bi renhyɛ no so.

²³ Na mebubu n’anim ahohiafo, na mabobɔ wɔn a wɔtan no.

²⁴ Na me nokwaredi ne m’adɔe ne no bɛtena, na me din mu na wɔbɛma n’abɛn so.

²⁵ Na mede ne nsa mesi po mu, na mede ne nifa masi nsubɔnten so.

²⁶ Ɔno de, ɔbɛfrɛ me sɛ: Wone m’agya, me Nyankopɔn ne me nkwagye botan!

²⁷ Na me nso mede no mɛyɛ m’abakan, asase so ahene mu pumpuni.

²⁸ Mɛkora m’adɔe so mama no daa, na m’apam atim hɔ ama no.

²⁹ Mɛma n’asefo atena hɔ daa, ne n’ahengua sɛ ɔsoro nna.

³⁰ Sɛ ne mma gyaw me mmara, na wɔnnantew m’atemmude mu,

³¹ sɛ wogu m’ahyɛde ho fi na wonni me mmara nsɛm so a,

³² ɛno de mede abaa mɛba mabɛhwɛ wɔn mmarato, na mede ɔhaw ahorow mabɛhwɛ wɔn amumɔyɛ.

³³ Na m’adɔe de, merenyi mimfi wɔn ho, na merenyɛ me nokwaredi no ho nsakyinsayam.

³⁴ Merengu m’apam ho fi, na merensakra nea afi m’anom no.

³⁵ Maka me kronkronyɛ ho ntam biako, merenni Dawid huammɔ.

³⁶ N’asefo bɛtena hɔ daa, na n’agua ayɛ m’anim sɛ owia.

³⁷ Ebetim hɔ sɛ ɔsram daa, na ɔsoro dansefo no yɛ ɔnokwafo. Sela

³⁸ Na wo ankasa de, woatow akyene na ayɛ wo nwini, na woafa nea woasra no no abufuw.

³⁹ Woapo w’akoa apam, woahura n’abotiri ho de ato fam.

⁴⁰ Woadwiriw ne ban nyinaa agu, woama n’aban akɛse ayɛ agowagow.

⁴¹ Wɔn a wotwam ɔkwan no so nyinaa fow no, wayɛ ahohora ama wɔn a wɔtete ne ho.

⁴² Woama n’ahohiafo nifa so, woama n’atamfo nyinaa ani agye.

⁴³ Woadan n’afoa ano nso, na woamma wannyina ɔsa mu.

⁴⁴ Woama n’anuonyam apa, na woatow n’agua akyene fam.

⁴⁵ Woatwa ne mmerantebere nna so, wode aniwu akata no so. Sela

⁴⁶ Enkosi da bɛn, AWURADE, na wode wo ho behintaw daa yi ama w’abufuw adɛw sɛ ogya?

⁴⁷ Kae me nna tiaa a ɛyɛ! Ade hunu yi ara nti na wobɔɔ nnipa mma nyinaa?

⁴⁸ Ɔdesani bɛn na ɔte ase a ɔrenhu wu, na obeyi ne kra afi asaman nsam? Sela

⁴⁹ Ɛhe na wo kan adɔe no wɔ, Awurade, nea wokaa ho ntam kyerɛɛ Dawid, wo nokware mu no?

⁵⁰ Awurade, kae wo nkoa ahohora a efi aman dodow no nyinaa mu a ɛda me koko so no.

⁵¹ AWURADE, w’atamfo bɔ ahohora, wɔbɔ nea woasra no no anammɔn ahohora!

⁵² Nhyira nka AWURADE daa. Amen ne Amen.