Nnwom 84 - KYERƐW KRONKRON

Onyankopɔn fi ho anigye

Wɔde ma dwonkyerɛfo sɛ wɔnto no Gatfo nne so. Kora mma dwom

¹ Wo tenabea hɔnom yɛ fɛ dɛn ara, asafo AWURADE.

² Me kra ani gyina, ɛtɔ piti po, AWURADE adiwo no nti; me koma ne me honam di ahurusi ma Onyankopɔn teasefo.

³ Nso akasanoma anya ɔdan, na asomfena anya buw a ɔbɛtow ne mma agu mu, ɛne w’afɔremuka no, asafo AWURADE, me hene ne me Nyankopɔn.

⁴ Nhyira ne wɔn a wɔte wo fi, wɔbɛkɔ so ayi wo ayɛ. Sela

⁵ Nhyira ne onipa a n’ahoɔden wɔ wo mu, na w’atempɔn wɔ ne komam.

⁶ Wotwam nusu bon no mu a, wɔdannan no nea mmasu wɔ, adonsu nso de nhyira pii kata so.

⁷ Wɔnantew fi ahoɔden mu kɔ ahoɔden mu bepue Onyankopɔn anim, Sion.

⁸ AWURADE, asafo Nyankopɔn, tie me mpaebɔ, yɛ aso, Yakob Nyankopɔn! Sela

⁹ Yɛn kyɛm, Onyankopɔn, hwɛ, na hwɛ nea woasra no no anim.

¹⁰ Na wo fi dakorodi ye sen nna apem. Mepɛ me Nyankopɔn fi nammɔnnampan mu tena mmom sɛn sɛ mɛtena abɔnefo ntamadan mu.

¹¹ Na owia ne kyɛm ne AWURADE Nyankopɔn. AWURADE ma ɔdom ne anuonyam, ɔmfa papa nkame wɔn a wɔnam tee no.

¹² Asafo AWURADE, nhyira ne onipa a ɔde ne ho to wo so.