Nnwom 80 - KYERƐW KRONKRON

Israel foforoyɛ

Wɔde ma dwonkyerɛfo sɛ wɔnto no “Sukooko” nne so. Asaf adansedi. Dwom

¹ Israel guanhwɛfo, yɛ aso, wo a woka Yosef sɛ nguankuw, wo a wote Kerubim so, pue haran.

² Efraim ne Benyamin ne Manase anim na ma wo hobere so, na bra begye yɛn.

³ Onyankopɔn, dan yɛn bra, na ma w’anim nhyerɛn na yɛanya nkwa.

⁴ AWURADE, asafo Nyankopɔn, wo bo befuw ahyɛ wo man mpaebɔ akosi da bɛn?

⁵ Wode nusu yɛɛ aduan ma wodii, na wode nusu ma wɔnomee.

⁶ Wode yɛn yɛɛ atutuw maa wɔn a wɔtete yɛn ho, na yɛn atamfo sereserew wɔ wɔn mu.

⁷ Asafo Nyankopɔn, dan yɛn bra, na ma w’anim nhyerɛn na yɛanya nkwa.

⁸ Wutuu obobe fii Misraim bae, wututuu amanaman na wobɛtɛwee.

⁹ Wuyii n’anim kwan, na egyee ntini, na ɛyɛɛ asase ma.

¹⁰ Ne nwini kataa mmepɔw so, na ne nhama kataa Onyankopɔn kyeneduru so.

¹¹ Ɛbaebae n’abaa mu koduu po ho, na n’abasa frɔmfrɔm kɔɔ asubɔnten no ho.

¹² Adɛn nti na woabubu ne ban, ma wɔn a wɔnam kwan so nyinaa tetew no yi?

¹³ Kwaem kɔkɔte sɛe no, na petee mu mmoa we.

¹⁴ Asafo Nyankopɔn, san w'akyi ɛ! Brɛ w’ani ase fi soro hwɛ, na bɛhwɛ obobe yi,

¹⁵ na bɛwaw nea wo nifa tɛwee no, ne ɔba a woafa no ayɛ wo de no pintinn.

¹⁶ Wɔde ogya ahyew no, wɔatwitwa no, w’anim ateɛteɛ nti wɔresɛe.

¹⁷ Fa wo nsa kata wo nifa nipa no so, onipa ba a woafa no ayɛ wo de pintinn no so,

¹⁸ na yɛrentwiw mfi wo nkyɛn. Ma yennya nkwa, na yɛmmɔ wo din.

¹⁹ AWURADE, asafo Nyankopɔn, dan yɛn bra, ma w’anim nhyerɛn na yɛanya nkwa.