Nnwom 77 - KYERƐW KRONKRON

Mmere a atwam ne nnɛ

Wɔde ma dwonkyerɛfo Yedutun. Asaf dwom

¹ Mema me nne so makyerɛ Onyankopɔn, na masu mafrɛ no, mema me nne so makyerɛ Onyankopɔn, na ɔbɛyɛ aso ama me.

² M’ahohia da mu na mehwehwɛɛ AWURADE, me nsam ateɛ anadwo nyinaa, na ɛmpa abaw, me kra kame awerɛkyekye.

³ Mekae Nyankopɔn a, misi apini, midwen a, me honhom tɔ beraw. Sela

⁴ Wukura m’anisuatɛtɛw mu, ɛpempem me, na mintumi menkasa.

⁵ Midwen tete nna no, tete mmere no mu mfe,

⁶ mekae m’anadwo dwom, midwen me komam, na me honhom hwehwɛmu pɛsɛpɛsɛ.

⁷ So AWURADE bɛtow akyene daa, na ɔrennom bi bio?

⁸ So n’adɔe awie mutwa koraa anaa? So n’asɛm a ɔkae no asa ama awo ntoatoaso nyinaa?

⁹ So Onyankopɔn werɛ afi ɔdom, anaasɛ ɔde abufuw atwe ne mmɔborohunu ato ne yam? Sela

¹⁰ Ɛnna mise: Me dadwen a ɛda me so ne sɛ ɔsorosoroni no nifa asakra.

¹¹ Mɛkae AWURADE nneyɛe maka, yiw, mɛkae wo tete anwonwade,

¹² na masusuw w’adwuma nyinaa ho, na madwen wo nneyɛe ho.

¹³ Onyankopɔn, wo kwan wɔ kronkronyɛ mu, hena na ɔyɛ onyame kɛse sɛ Onyankopɔn?

¹⁴ Wone Nyankopɔn a woyɛ anwonwade, woama wɔahu wo tumi, aman mu.

¹⁵ Wode wo nsa na agye wo man, Yakob ne Yosef mma no. Sela

¹⁶ Asuasu huu wo, Onyankopɔn, asuasu huu wo, na wɔbɔɔ birim, abun nso wosowosowee.

¹⁷ Amununkum tɔɔ osu pribibibi, wim tɔnn gyigyei, w’agyan nso popaa anyinam,

¹⁸ wo prannaa boboom, ahum a edi kyinhyia mu. Anyinam hyerɛn wiase, asase popoe, na ɛwosowee.

¹⁹ Wo kwan faa po mu, ne wo tempɔn nsu pii mu, na wɔanhu w’anammɔn.

²⁰ Wonam Mose ne Aaron nsa so begyaa wo man sɛ nguankuw.