Nnwom 74 - KYERƐW KRONKRON

Asafo no amanehunu mu sufrɛ

Asaf nnwenho dwom

¹ Onyankopɔn, adɛn nti na woasum yɛn agu koraa, na w’abufuw rehyew w’adidibea nguan?

² Kae w’asafo a wotɔɔ wɔn teteete, na wugyee wɔn sɛ w’agyapade mantam no, Sion bepɔw a wobɛtenaa so no.

³ Ma w’anan so bɛhwɛ daa amamfo no, ɔtamfo asɛe kronkron mu hɔ ade nyinaa.

⁴ W’atamfo teɛteɛm w’ahyiae mu, wɔasi wɔn nsɛnkyerɛnne de ayɛ nsɛnkyerɛnne.

⁵ Ɛyɛe sɛ wɔma mmonnua so kɔ soro rebetwa kwae mu nnupa,

⁶ na afei ɛho nnwinne nyinaa, wɔde akuma ne asae abubu.

⁷ Wɔde ogya ato wo kronkron mu hɔ, wɔagu nea wo din tenae no ho fi.

⁸ Wɔkae wɔn komam sɛ: Momma yemmia wɔn nkɔ fam prɛko. Wɔahyehyew Onyankopɔn ahyiae nyinaa, asase yi so.

⁹ Yenhu yɛn nsɛnkyerɛnne, odiyifo bi nni hɔ bio, na yɛn mu biara nnim da ko a ɛbɛkɔ akosi.

¹⁰ Onyankopɔn, ɔhohiafo nka ahohorasɛm nkosi da bɛn? Ɔtamfo ngu wo din ho fi daa anaa?

¹¹ Adɛn nti na wotwe wo nsa, wo nsa nifa? Yi fi wo kokom na sɛe wɔn!

¹² Nanso Onyankopɔn ne me hene fi teteete, ɔyɛ ogye adwuma asase so.

¹³ Wo na wode w’ahoɔden paee po mu, wobobɔɔ nsu atweaseɛ ti, nsu no ani.

¹⁴ Wopɛtɛw bonsu ti, wode wɔn yɛɛ sare sofo aduan.

¹⁵ Wo na wuyii nsu aniwa ne asubɔnten, womaa asukɛse a ɛsen daa yowee.

¹⁶ Adekyee yɛ wo de, anadwo nso wɔ wo, wo na woasiesie akanea ne owia.

¹⁷ Wo na woatwa asase ano nyinaa hye, wo na woyɛɛ ahohuru ne awɔw bere.

¹⁸ Kae eyi sɛ atamfo bɔɔ AWURADE ahohora, AWURADE, na ɔman nnyennyentwi huraa wo din ho.

¹⁹ Mfa w’aturukuku kra nhyɛ mmoa nsa, mma wo werɛ mmfi wo mmɔborɔfo kra da.

²⁰ Ma w’ani mmra apam no so, na atirimɔdensɛm tenabea ayeyɛ asase so nkokoam ma.

²¹ Mma nea wɔhyɛ no so mmfa ahohora nnsan mmma, ma ɔmanehunufo ne ohiani nyi wo din ayɛ.

²² Onyankopɔn, sɔre, bedi wo ara w’asɛm, kae sɛnea nkwasea bɔ wo ahohora daa adesae.

²³ Mma wo werɛ mmfi w’atamfo nne, wɔn a wɔsɔre hyɛ wo no gyegyeegye a ɛkɔ soro daa yi.