Nnwom 71 - KYERƐW KRONKRON

AWURADE, nnyaw me

¹ Wo AWURADE na maguan matoa wo, m’anim rengu ase da biara da.

² Fa wo trenee yi me, na gye me, yɛ aso ma me, na gye me nkwa.

³ Yɛ sɛ ɔbotan a mɛtena so maba hɔ daa yi. Woahyɛ sɛ wonnye me nkwa, na wone me botan ne me ho fasu.

⁴ Me Nyankopɔn, gye me fi ɔbɔnefo nsam, gye me omumɔyɛfo ne otirimɔdenfo nsam.

⁵ Na wo, AWURADE, ne m’anidaso, nea mifi me mmofraase mede me ho metoo no so.

⁶ Wo na mifi yafunum mede m’akyi mitwerii wo, wuyii me fii me na yam, wo na meyi wo ayɛ daa yi.

⁷ Mayɛ nnipa bebree ani so anwonwade, na wone me guankɔbea a ɛyɛ den.

⁸ W’ayeyi ne wo nidi bɛhyɛ m’anom ma daa adesae.

⁹ Ntow me nkyene nkwakorabere, na sɛ m’ahoɔden sa a, nnyaw me.

¹⁰ Na m’atamfo ka me ho asɛm, na wɔn a wobuw me kra bom tu agyina

¹¹ ka sɛ: Onyankopɔn agyaw no; muntiw no nkyere no, na obi nni hɔ a obegye no.

¹² Onyankopɔn, mma me ne wo ntam nnware, me Nyankopɔn, yɛ ntɛm bɛboa me.

¹³ Me kra ho asɛmpɛfo ani bewu na wɔayera, ahohora ne nsopa bɛkata wɔn a wɔpɛ me bɔne so.

¹⁴ Na me de, mɛtwɛn ara daa yi, na mede bi maka w’ayeyi nyinaa ho.

¹⁵ M’ano bɛka wo trenee ne wo nkwagye daa adesae, efisɛ minnim ano.

¹⁶ Mede AWURADE ahoɔdenne mɛba mabɛkae wo trenee, wo nkutoo de no.

¹⁷ Onyankopɔn, wo na wufi me mmofraase kyerɛkyerɛɛ me, na maka w’anwonwade no mabedu sesɛɛ.

¹⁸ Onyankopɔn, nkwakorabere ne dwen mu nso nnyaw me, kosi sɛ mɛka wo tumi ho asɛm makyerɛ nkyirimma, na maka wo mmaninyɛ makyerɛ wɔn a wɔbɛba nyinaa.

¹⁹ Na, Onyankopɔn, wo trenee kɔ ɔsorosoro, wo a woayɛ ade akɛse, Onyankopɔn, hena na ɔte sɛ wo?

²⁰ Wo a woma yehuu amane bebree a ɛyɛ yaw, wobɛma yɛanya nkwa bio, na woatwe yɛn afi asase aku mu asan aba.

²¹ Wobɛma me kɛseyɛ adɔ, na woadan w’ani akyekye me werɛ.

²² Me nso mede bɛnta sanku meyi wo ayɛ, me Nyankopɔn ne wo nokware, mede sankuten mɛto wo, Israel hotefo no, dwom.

²³ Meto ayeyi dwom mema wo a, m’ano ne me kra a woagye no no ho bɛsan no.

²⁴ Mede me tɛkrɛma nso mɛka wo trenee ho asɛm daa, efisɛ wɔn a wɔpɛ me bɔne no ani awu, na wɔn anim agu ase.