Nnwom 69 - KYERƐW KRONKRON

AWURADE akoa a ɔwɔ amanehunu mu

Wɔde ma dwonkyerɛfo sɛ wɔnto no “Sukooko” nne so. Dawid de

¹ Onyankopɔn, gye me nkwa, na nsu adu me kra ho.

² Matɔ amoa kuronkuron atɛkyɛ a gyinabea nni hɔ mu, madu bun a nsu bu kata me so mu.

³ Me sufrɛ ama mabrɛ, me menewa mu ayow, mahwɛ me Nyankopɔn kwan ma m’ani abu.

⁴ Wɔn a wɔtan me kwa dɔɔso sen me ti so nwi, m’asɛefo a wɔyɛ m’atamfo atorofo dɔɔso, nea memfae no, wose mennan memma.

⁵ Onyankopɔn, wunim me nkwaseasɛm, na me mfomso nhintaw wo ɛ.

⁶ AWURADE, asafo AWURADE, mma wɔn a wɔtwɛn wo ani nnwu me ho, Israel Nyankopɔn, mma wɔn a wɔhwehwɛ wo no anim nngu ase, me nti.

⁷ Na wo nti na magye ahohora, na aniwu ahyɛ m’ani so ma.

⁸ Madan me nuanom mu ɔhɔho, mayɛ me na mma mu ɔnanani.

⁹ Na wo fi ho mmɔdemmɔ amene me, na wɔn a wɔbɔ wo ahohora ahohorabɔ aba me so.

¹⁰ Na me kra suu mmuada mu, na ɛdan me ahohorabɔ.

¹¹ Mede atweaatam meyɛɛ me ntama, na meyɛɛ wɔn akasabebui.

¹² Wɔn a wɔtete kurow pon mu ka me ho asɛm, na asanomfo de me to dwom.

¹³ Na me de, mebɔ wo, AWURADE, mpae, ɔdom bere mu; Onyankopɔn, w’adɔe kɛse nti, fa wo nkwagye nokware gye me so.

¹⁴ Yi me fi atɛkyɛ mu, na mammem, ma wonyi me mfi wɔn a wokyi me nsam ne abun mu.

¹⁵ Mma asu a ayiri no mmfa me, na mma ebun mmmene me, na mma amoa nnka me nnhyɛ mu mmmua n’ano.

¹⁶ AWURADE, gye me so, na w’adɔe ye, dan w’ani kyerɛ me, sɛ wo mmɔborohunu bebree no te.

¹⁷ Na nyi w’ani nhintaw w’akoa, na me ho hia me, gye me so ntɛm.

¹⁸ Twiw bɛn me kra, na begye no, m’atamfo nti gye me.

¹⁹ Wunim m’ahohora ne m’aniwu ne me nsopa, w’ani tua m’ahohiafo nyinaa.

²⁰ Ahohora apɛtɛw me koma, na abɔ me yare, na mehwɛ nea ɔrebɛma me due kwan a, obi mma, mehwehwɛ awerɛkyekyefo a, minhu bi.

²¹ Wɔde bɔnwoma yɛɛ m’aduan, na me sukɔm mu wɔmaa me nsa nyinyanyinya sɛ mennom.

²² Ma wɔn pon a esi wɔn anim nnan sɛ apa, na wodi yiye a, ma ɛnyɛ afiri mma wɔn.

²³ Ma wɔn ani so nyɛ wɔn kusuu, na wɔanhu ade, na ma wɔn sisi mpopo daa,

²⁴ ma w’ani mmere wɔn so, na w’awerɛhow ne w’abufuw nka wɔn.

²⁵ Ma wɔn tenabea nnan amamfo, na obiara nntena wɔn ntamadan mu.

²⁶ Efisɛ wɔtaa nea wo ara woabɔ no no, na wɔka wɔn a woapira wɔn no yaw kyerɛ.

²⁷ Ma amumɔyɛ mmɔ wɔn amumɔyɛ so, na mma wɔmmma wo trenee mu.

²⁸ Ma wonyi wɔn mfi ateasefo nhoma mu, na mma wɔnnkyerɛw wɔne treneefo din mmmom.

²⁹ Na me de, meyɛ ɔmanehunufo ne ɔwerɛhowni, Onyankopɔn, ma wo nkwagye mma me so.

³⁰ Mede dwonto meyi Nyankopɔn din ayɛ, na mede aseda makamfo no.

³¹ Na ɛbɛsɔ AWURADE ani yiye asen nantwinini a ɔwɔ mmɛn na ne tɔte mu apae.

³² Ahobrɛasefo hu a, wɔn ani begye; mo a mohwehwɛ Onyankopɔn akyi kwan, mo koma nnya nkwa.

³³ Na AWURADE tie ahiafo, na ɔnto n’apokyerɛfo ho mpe.

³⁴ Ma ɔsoro ne asase nyi no ayɛ, ɛpo ne nea ɛkeka ne ho wɔ mu nyinaa.

³⁵ Na Onyankopɔn begye Sion na wakyekye Yuda nkurow, na wɔatena mu, na ayɛ wɔn dea.

³⁶ Na ne nkoa asefo benya adi, na wɔn a wɔpɛ ne din no atena mu.