Nnwom 66 - KYERƐW KRONKRON

Nkwagye ho ayeyi dwom a wɔto

Wɔde ma dwonkyerɛfo. Dwom

¹ Asase nyinaa, munni ahurusi mmɔ ose mma Onyankopɔn,

² monto dwom mma ne din anuonyam, monhyɛ no anuonyam nyi no ayɛ.

³ Munse Onyankopɔn sɛ: Wo nnwuma yɛ hu ampa. Wo tumi kɛse nti w’atamfo bɛkotow wo.

⁴ Asase nyinaa bɛsɔre wo, na wɔato wo dwom, wɔbɛto dwom ama wo din. Sela

⁵ Mommra mmɛhwɛ Onyankopɔn nneyɛe, n’ade a ɔyɛ de di nnipa mma so yɛ hu.

⁶ Ɔmaa ɛpo dan asase kesee, wɔde anammɔn twaa asu kɛse, ɛno nti yɛn ani gye ne ho.

⁷ Nea ɔde ne tumi di hene daa no, ɔwɔ amanaman ho ani. Mma mansotwefo mmma wɔn ho so. Sela

⁸ Aman, munhyira yɛn Nyankopɔn, na momma wɔnte n’ayeyi yiye.

⁹ Ɔde yɛn kra asi nkwa mu, na wamma yɛn nan anwatiri.

¹⁰ Na wo Nyankopɔn, na woakari yɛn ahwɛ, woanan yɛn ahwɛ sɛ wɔnan dwetɛ hwɛ mu.

¹¹ Wode yɛn ahyɛ asawu mu, wode adesoa pemee asoa yɛn.

¹² Woama ɔdesani anantew yɛn ti so, yɛafa ogya ne nsu mu, nanso woayi yɛn aba nea nnepa abu so hɔ.

¹³ Mede ɔhyew afɔre mɛkɔ wo fi, mɛma wo m’aboade,

¹⁴ nea mede mibuee m’ano, ne nea m’ano kae m’ahohia mu no.

¹⁵ Mede nguan a wɔadɔ ne adwennini a ɛyɛ huam mɛbɔ wo ɔhyew afɔre, mede anantwi ne mpapo mɛbɔ afɔre. Sela

¹⁶ Mo a musuro Onyankopɔn nyinaa, mommra mmetie, na mɛka nea wayɛ ama me kra.

¹⁷ Mede m’ano misu mefrɛɛ no, na mede me tɛkrɛma miyii no ayɛ.

¹⁸ Sɛ midi ahuhude akyi me komam a, anka AWURADE rentie me.

¹⁹ Ampa ne ampa, Onyankopɔn atie me, wayɛ aso atie me mpaebɔ.

²⁰ Nhyira ne Nyankopɔn a wannan me mpaebɔ ani, na wanyi n’adɔe amfi me so.