Nnwom 63 - KYERƐW KRONKRON

Onyankopɔn ho anigyina

Dawid dwom. Ɔwɔ Yuda sare so no, na ɔtoe

¹ Onyankopɔn, wone me Nyankopɔn, mehwehwɛ wo anɔpahema, wo ho sukɔm de me kra, me honam agurow pɛ wo hɔ biribi, asase kesee a nsu nni so ma ɛtɔ piti so.

² Ne saa na mehwɛɛ wo wɔ kronkronbea hɔ, sɛ mehu wo tumi ne w’anuonyam.

³ Na w’adɔe ye sen nkwa, mede m’ano meyi wo ayɛ.

⁴ Ne saa na mete ase yi mehyira wo, wo din mu na mɛma me nsa so.

⁵ Ɛbɛmee me kra sɛ hon ne srade, na mede ahosan mu anotew meyi wo ayɛ.

⁶ Sɛ mekae wo me kɛtɛ so a, medwen wo ho, adasu mu.

⁷ Na woayɛ me boafo, na wo ntaban ase nwini mu midi ahurusi.

⁸ Me kra bata wo ho di w’akyi, wo nsa nifa so me mu.

⁹ Na wɔn a wɔpɛ me kra asɛe no no besian akɔ asase ase tɔnn.

¹⁰ Wɔde wɔn bɛto afoa ano, wɔbɛyɛ sakraman de.

¹¹ Na ɔhene de, n’ani begye Onyankopɔn ho; obiara a ɔka ne ntam no de bɛhyehye ne ho, na wobemua wɔn a wodi atoro ano.