Nnwom 60 - KYERƐW KRONKRON

Nkogu akyi mpaebɔ

Wɔde ma dwonkyerɛfo sɛ wɔnto no “Adansedi sukooko” nne so. Dawid abebu dwom. Wɔmfa nkyerɛkyerɛ ade. Ɔtoe bere a ɔne Mesopotamia ne Soba Siriafo koe, na Yoab san kokum Edomfo ɔpedumien, nkyene bon mu no

¹ Onyankopɔn, woasum yɛn agu, woabɔ yɛn apansam, wo bo afuw; ma yɛn ho mmra yɛn ho bio.

² Woama asase awosow, woapae mu, fa n’asinasin sisi anim, na ehinhim.

³ Woama wo man ahu nea ɛyɛ den, woama yɛanom ntintan nsa.

⁴ Wode frankaa ama w’afɛrefo sɛ wɔmfa mma wɔn ho so, nokware nti. Sela

⁵ Nea ɛbɛyɛ na wɔagye w’adɔfo nti fa wo nifa gye yɛn nkwa, na gye yɛn so.

⁶ Onyankopɔn akasa n’ahotew mu: Medi ahurusi, mɛkyɛ Sekem mu, na masusuw Sukot bon.

⁷ Gilead wɔ me, na Manase wɔ me, na Efraim yɛ me ti so dadekyɛw, Yuda yɛ m’ahempoma

⁸ Moab yɛ me guasɛn, Edom so na mɛtow me mpaboa magu, me nti Filistifo asase teɛteɛm.

⁹ Hena na ɔde me bɛkɔ kurow dennen no mu, hena na obegya me akɔ Edom?

¹⁰ Ɛnyɛ wo, Nyankopɔn, na woasum yɛn agu yi, na wo, Nyankopɔn, ne yɛn dɔm ankɔ?

¹¹ Bɛboa yɛn ahohia mu, na onipa gye nyɛ ogye bi.

¹² Yɛde Nyankopɔn na ɛbɛyɛ mmaninne, na ɔno na obetiatia yɛn ahohiafo so.