Nnwom 58 - KYERƐW KRONKRON

Onyankopɔn ne ɔtemmufo

Wɔde ma dwonkyerɛfo sɛ wɔnto no “Nsɛe!” nne so. Dawid abebu dwom

¹ Mo atumfo, ampa ara moka asɛntrenee? Oo, nnipa mma, mubu atɛntrenee anaa?

² Dabi, mudi asɛmmɔne koma mu, mo nsam akokobirisɛm na mokari de ma, asase so.

³ Abɔnefo bɔ ko fi yafunum, wofi wɔn na yam fom kwan di atoro.

⁴ Wɔn bɔre te sɛ ɔwɔ bɔre, wɔte sɛ ahurutoa sitifo a wasiw n’aso

⁵ a entie ntafowayifo a woyi nkonyaa nyansam.

⁶ Onyankopɔn, bubu wɔn se wɔn anom, AWURADE, tutu gyataforo sebɔmmɔfo.

⁷ Wɔbɛyow sɛ nsu a ɛretwe, ma wontiatia wɔn so sɛ sare, na ma wɔnhyew.

⁸ Ɔsen sɛ nwaw a wɔapɛtɛw no, sɛ ɔba a ɔbea apɔn a onhuu owia da.

⁹ Ansa na mo nkutu bɛte nsɔe no nka no, sɛ ɛyɛ momono oo, ɛreben oo, ɔde abufuhyew bɛpra ne nyinaa agu.

¹⁰ Ɔtreneeni ani begye sɛ wahu aweredi, ɔbɛhohoro ne nan ase, ɔbɔnefo mogya mu.

¹¹ Na nnipa bɛka sɛ: Ampa, akatua wɔ hɔ ma ɔtreneeni, ampa Onyankopɔn bi wɔ hɔ a obu atɛn asase so.