Nnwom 55 - KYERƐW KRONKRON

Dwom a etia ɔtan ne nnaadaa

Wɔde ma dwonkyerɛfo sɛ wɔmfa sanku nto. Dawid nnwenho dwom

¹ Onyankopɔn, yɛ aso tie me mpaebɔ, na nhintaw wo ho mfi me nkotɔsrɛ ho.

² Wɛn w’aso ma me, na gye me so. M’adwene nnwam me nkɔmmɔ mu, na misi apini,

³ ɔtamfo nne ne abɔnefo ahoguan nti. Na wɔbɔ mmusu gu me so, na wɔde abufuw tan me.

⁴ Me koma pere wɔ me mu, na owu ho hu agu me so.

⁵ Osuro ne ahopopo aba me so, na ahoyeraw akata me so.

⁶ Na mise: O, sɛ mewɔ ntaban sɛ aborɔnoma de ɛ, anka metu makɔtena baabi.

⁷ Yiw, anka meguan makɔ akyirikyiri, na makɔtena sare so. Sela

⁸ Anka mɛyɛ ntɛm maguan mafi mframa kɛse ne ahum yi mu.

⁹ AWURADE, yɛ wɔn basabasa, paapae wɔn tɛkrɛma mu, na mahu amimdi ne atutuw, kurow no mu.

¹⁰ Awia ne anadwo wɔnam n’afasu so twa ho hyia, na amumɔyɛ ne ɔhaw wɔ mu.

¹¹ Amammɔesɛm wɔ mu, na nhyɛso ne nnaadaa mpa n’abɔnten so.

¹² Na ɛnyɛ ɔtamfo na ɔbɔ me ahohora, ɛno de, anka metie. Ɛnyɛ nea okyi me na ɔkyerɛ ne ho wɔ me so, anka mede me ho mehintaw no.

¹³ Na wo, me yɔnko a me ne wo bɔ, me yɔnko ne me manni,

¹⁴ wo a wo ne me di atirimsɛm dɛdɛ, na yɛnam yuu kɔ Onyankopɔn fi.

¹⁵ Ma owu ntow nsi wɔn so, ma wonsian nkɔ asaman anikan, na nsɛmmɔne wɔ wɔn tenabea ne wɔn mu.

¹⁶ Me de, mesu mafrɛ Onyankopɔn, na AWURADE abegye me.

¹⁷ Anadwofa ne anɔpa ne owigyinae na medwen me tirim na masi apini, na ɔbɛte me nne.

¹⁸ Wagye me kra asomdwoe mu, na wɔammɛn me, na wɔn a wɔne me anya dɔɔso.

¹⁹ Onyankopɔn bɛte na wabua wɔn, na ɔno na ɔte hɔ fi teteete. Wɔn de, wɔnsakra, nanso wonsuro Onyankopɔn. Sela

²⁰ Ɔteɛ ne nsa ne yɔnko pa nom so, wabu n’apam so.

²¹ N’anom nsɛm yɛ fekɔɔ sen bɔta, nanso ɔko wɔ ne komam. Ne nsɛm mu dwo bɛtɛɛ sen ngo, nanso ɛyɛ mfoa a wɔatwe.

²² Dan w’adesoa to AWURADE so, na obeso wo mu, ɔremma ɔtreneeni ntwiw n’anan mu da.

²³ Na wo, Nyankopɔn, wode wɔn bɛkɔ ɔsɛe amoam, mogyapɛfo ne nnaadaafo renni wɔn nna fa, na me de, mede me ho meto wo so.