Nnwom 52 - KYERƐW KRONKRON

Amimfo awiei

Wɔde ma dwonkyerɛfo. Dawid nnwenho dwom. Ɔtoe bere a Edomni Doeg bɛka kyerɛɛ Saulo sɛ Dawid aba Ahimelek fi no

¹ Ɔkatakyi, ɛdɛn na wohoahoa wo ho bɔne ho? Onyankopɔn adɔe wɔ hɔ daa nyinaa.

² Okontomponi, wo tɛkrɛma dwen mmusubɔ ho te sɛ oyiwan a ano yɛ hwetahweta.

³ Wopɛ bɔne sen papa, wopɛ atoro sen sɛ wobɛka nea ɛteɛ. Sela

⁴ Nkɔnkɔnsa tɛkrɛma, wopɛ amammɔesɛm ara nko.

⁵ Onyankopɔn bɛbɔ wo ahwe fam koraa, obeyi wo hɔ atu wo afi wo tenabea, na watutu w’ase afi ateasefo asase so. Sela

⁶ Treneefo nso behu asuro, na wɔaserew no sɛ:

⁷ Hwɛ, onipa a wamfa Onyankopɔn anyɛ n’ahoɔden, na ɔde ne ho too n’ahode bebree no so, na ɔhyɛɛ ne ho den, n’anibere mu, no ni.

⁸ Na me de, mete sɛ ngo dua frɔmfrɔm, Onyankopɔn fi, mede me ho meto Nyankopɔn dom so daa daa.

⁹ Meyi wo ayɛ sɛ wo na woyɛe, na mɛtwɛn wo din, efisɛ eye, w’ahotefo anim.