Nnwom 51 - KYERƐW KRONKRON

Dawid ahonu mpaebɔ

Wɔde ma dwonkyerɛfo. Dawid dwom; ɔkɔɔ Batseba ho a odiyifo Natan baa ne nkyɛn no na ɔtoe

¹ Onyankopɔn, hu me mmɔbɔ, sɛ w’adɔe te no, wo mmɔborohunu a ɛdɔɔso nti popa me mmarato.

² Hohoro me ho fi m’amumɔyɛ mu koraa, na prapra me ho fi me bɔne mu.

³ Na me mmarato no, mahu, na me bɔne wɔ m’anim daa yi.

⁴ Wo nko ara na mafom wo, na mayɛ nea ɛyɛ w’ani so bɔne, na woadi bem wo kasam, na wo ho atew, w’atemmu mu.

⁵ Hwɛ, wɔwoo me amumɔyɛ mu, na bɔne mu na me na nyinsɛn me.

⁶ Hwɛ, wopɛ nokware, m’asaabo mu, na ma minhu nyansa me mu ahintawee mu.

⁷ Fa adwerɛ yi me ho bɔne, na me ho afi, guare me, na mayɛ fitaa asen nsukyerɛma.

⁸ Ma mente anigye ne abotɔyam nsɛm, na nnompe a woabubu no adi ahurusi.

⁹ Yi w’ani fi me bɔne ho hintaw, na popa m’amumɔyɛ nyinaa.

¹⁰ Onyankopɔn, bɔ koma a emu tew ma me, na yɛ honhom foforo a ase tim wɔ me mu.

¹¹ Ntow me mfi w’anim nkyene, na nyi wo honhom kronkron mfi me so.

¹² Ma minnya wo nkwagye ho abotɔyam bio, na ayamye honhom nso me mu.

¹³ Mɛkyerɛ mmaratofo w’akwan, na nnebɔneyɛfo adan aba wo nkyɛn.

¹⁴ Onyankopɔn, me nkwagye Nyankopɔn, gye me fi mogya ho fɔ mu, na me tɛkrɛma ato wo trenee ho ahurusi dwom.

¹⁵ AWURADE, bue m’ano, na mede m’ano maka w’ayeyi.

¹⁶ Na wompɛ afɔrebɔ, anka mɛbɔ, ɔhyew afɔre nsɔ w’ani.

¹⁷ Onyankopɔn afɔre ne honhom a abubu; Onyankopɔn, koma a abubu na apɛtɛw na worempo.

¹⁸ Ma ɛnyɛ wo fɛ sɛ wobɛyɛ Sion yiye; to Yerusalem afasu!

¹⁹ Ɛno na wobɛpɛ trenee afɔre, ɔhyew afɔre ne afɔre mu, ɛno na wɔde anantwinini bɛkɔ w’afɔremuka so.