Nnwom 47 - KYERƐW KRONKRON

Onyankopɔn di hene

Wɔde ma dwonkyerɛfo. Kora mma dwom

¹ Aman nyinaa, mommɔ mo nsam, momfa anigye huro mmɔ ose mma Onyankopɔn.

² Na AWURADE a ɔwɔ sorosoro no ho yɛ hu, ɔyɛ ɔhenkɛse, asase nyinaa so.

³ Ɔbrɛ aman ase de hyɛ yɛn ase, na ɔde nkurɔfo hyɛ yɛn nan ase.

⁴ Oyi yɛn apɛgyade ma yɛn, Yakob a ɔdɔ no no anuonyanne. Sela

⁵ Onyankopɔn de anigye huro kɔ ɔsoro, AWURADE de torobɛnto gyigye kɔ.

⁶ Monto Onyankopɔn dwom, monto ayeyi dwom, monto dwom mma yɛn hene, monto ayeyi dwom.

⁷ Na Onyankopɔn ne asase nyinaa so hene, mommɔ sanku nto nnwenho dwom.

⁸ Onyankopɔn di amanaman so hene, Onyankopɔn te n’ahengua kronkron so.

⁹ Aman ahene boaboa wɔn ho ano, Abraham Nyankopɔn man. Na asase so akyɛm wɔ Onyankopɔn, wɔama no so kɛse.