Nnwom 46 - KYERƐW KRONKRON

“Yɛn Nyame ne abankɛse”

Wɔde ma dwonkyerɛfo. Kora mma dwom. Wɔnto no “Mmaabun” nne so

¹ Onyankopɔn yɛ yɛn guankɔbea ne ahoɔden, ahohia mu boafo pa a wɔanya no nhui.

² Enti kansesɛ asase ani dan butuw, na mmepɔw tutu gu po bun mu,

³ na emu nsu woro na ehuru na n’asorɔkye ma mmepɔw wosow a, yɛrensuro. Sela

⁴ Asu bi, n’abaa ma Onyankopɔn kurow ani gye, ɔsorosoroni tenabea kronkron no.

⁵ Onyankopɔn te mfinimfini, ɛnwosow, Onyankopɔn boa no anɔpahema.

⁶ Amanaman yɛ hoo, ahenni wosowosow, ɔma ne nne so ma asase nan.

⁷ Asafo AWURADE ne yɛn wɔ hɔ, Yakob Nyankopɔn ne yɛn abankɛse. Sela

⁸ Mommra mmɛhwɛ AWURADE nnwuma, ɔsɛe ko a wama aba asase so.

⁹ Ɔma akodi gyae kosi asase ano, obubu ta mu na otwitwa peaw mu asinasin, ɔde gya hyew nteaseɛnam.

¹⁰ Monyɛ komm na munhu sɛ mene Nyankopɔn. Wɔmma me so, amanaman mu, wɔmma me so, asase so.

¹¹ Asafo AWURADE ne yɛn wɔ hɔ, Yakob Nyankopɔn ne yɛn abankɛse. Sela